​​​​​​​Meclisa Olî teqezî bi girîngiya hevgirtinê kir

Hevserokê Meclisa Olî ya Herêma Firatê Ebdurehman Şewket der barê bûyerên li Dêrazorê rû dane de, ji ajansa me re wiha axivî: "Bûyerên li Dêrazorê çêbûne, planeke metirsîdar e ku gelek hêzan di serî de dewleta Tirk a dagirker û hikumeta Şamê, xwestin fitneyê di nava xelkê herêmê de derxin. Ji bo wê komên çekdar derbasî wir kirin da ku şerê QSD`ê bikin. Ji ber wê li ser pêla êlî lîstin."

Şewket wiha lê zêde kir: "Li Bakur û Rojhilatê Sûriyeyê her kes bi aramî û bi hev re dijî. Hemû pêkhateyên herêmê ji bo parastina xak û destkeftiyên xwe bûn yek. Dijmin û dagirker ji hevgirtina pêkahteyan ditirsin. Ji ber wê fikrên xwe yên bi cehrî li herêmê belav dike ji bo ku pirsigrêkê di nava gel de derkeve.”

Her wiha Şewket got: “Kesên îdia dikirin ew êl in, dema DAIŞ`ê ew herêm wêran dikirin û xelkê êlên herêmê serjê dikirin, li ku derê bûn? Dema şerê wan li dijî xelkê herêmê bi bin ket berê xwe dan rêbazeke din û li ser pêla olan lîstin, ji bo ku armancên xwe pêk bînin.”

Şewket destnîşan kir ku xwîna Kurd, Ereb, Suryan, Aşûr û Turkmenan li ser vê xakê bû yek û kes nikare vê têkiliyê qut bike.

Şewket bang li şêniyên herêmê kir ku li hember planên dijmin tedbîr bigirin û guh nedin fîtne û siloganên xapînok ên aliyên ku dixwazin aramiya herêmê têk bibin.

Şewket di dawiya axaftina xwe de got: "Divê her kes vê plana li dijî herêmê nas bike. Dijmin, naxwazin em di nava aştiyê de bin. Lê belê dixwazin herêm parçekirî bimîne û xelkê wê lawaz be, şerê hev bikin ji bo ku herêmê bi hêsanî kotrol bike.”

(mh/şx)

ANHA