Dewleta Tirk li Başûrê Kurdistanê gelek dever bombebaran kirin

Li gorî nûçeya Rojnews, di 24’ê Tebaxê saet 15:30’an de balafirên bê mirov û bi çek ên dewleta Tirk a dagirker, gundên Salîyawe yê ser bajarokê Pênciwên ê li sînorê parêzgeha Silêmaniyê bombebaran kir. Di encamê de agir bi daristanên gundê Kanî Mîran a Komarî û Binawyan ket.

Di derbarê vê yekê de jîngehparêz û endamê Rêxistina Mala ji bo Parastina Jîngehê Bextiyar Elî ji Rojnews’ê re axivî û wiha got: “Piştî derketina agir em lez û bez çûn vemirandinê. Başe bi hevkariya hinek gundiyên herêmê heta saet 17:00’an agir hate kontrolkirin û vemirandin. Lê mixabin ji ber darên şewitîn, di sibeha 25’ê Tebaxê de carek din agir serîhilda. Heta agir gihişte gundên Zengîder û zeviyên mayinkirî ji kontrolê derket. Ji ber bombebarana dewleta Tirk a dagirker, daristanên gundên Salîlawe, Kanî Mîran a Komarî, Binawyan û Zengîder bi temamî şewitîn.”

Bextiyar Elî di dewama axaftina xwe de destnîşan kir ku ev bombebaran zerer û ziyanek mezin daye jîngeh û xwezaya herêmê û wiha got: “Tê texmînkirin ku 500 donim daristan şewitiye ku darên tê de temenê wan 100 salan zêdetir bûn, lê bûn xwelî. Mixabin tevî ku me di derbarê metirsiya zerer û ziyanên agir de agahdar kirin jî, lê tu aliyên peywendîdar ji bo vemirandina agir nehatin, ne polîsên daristanê, ne parastvanên şaristaniyê û ne jî qeymeqam. Agir heta vê danê sibehê jî berdewam bû, lê tiştek din ku bişewitîne nemabû lewma vemirî.''

Bextiyar Elî herî dawî diyar kir ku metirsiya agir hîna berdewame û wiha axivî: “Em wek çalakvan û jîngehparêzan, bombebaranên dewleta Tirk şermezar dikin. Îsal ev cara sêyeme ku di encama bombebarana dewleta Tirk de agir bi daristanan dikeve û jîngeha herêma me dişewite. Em vê yekê qebûl nakin û şermezar dikin.”