Bi civînekê xurtkirina eniya hundirîn hat nîqaşkirin

Meclisa Partiya Sûriya Pêşerojê şaxê rojhilatê Dêrazorê bi hevkariya Meclisa Gel a bajarokê Hecînê bi sernavê ′Xurtkirina eniya hundirîn misogeriya paşeroja me ye′ civînek li dar xist.

Civîn li hola Meclisa Gel a Hecînê hate lidarxistin, bi dehan şênî, nûnerên meclisên herêmê, endamên saziyên sivîl, partiyên siyasî, komîteyên jinan û Kombûna Jinan a Zenûbya beşdar bûn.

Serokê Nivîsgeha Rêxistinî ya Partiya Sûriya Pêşerojê Elaa El Seîd axivî û bal kişand ser pêwîstî û girîngiya sekinandina li hember şerê taybet ê li dijî herêmên Bakur û Rojhilatê Sûriyeyê û bi taybet herêma Dêrazorê. El Seîd got: "Divê em li hember aliyên derve yên hewl didin fitne û şerê bixin nava gelê herêmê hişyar bin."

El Seîd destnîşan kir ku armanc ji şerê taybet ê li dijî herêmê, têkbirina destkeftiyên hatine bidestxistin yên dikevin xizmeta gel e û wiha domand: “Divê em eniya hundirîn xurt bikin û li hember her kesê hewl dide ewlehî û îstiqrara herêmê têk bibe, bisekinin."

Beşdarên civînê jî diyar kir ku divê eniya hundirîn bi rêya zêdekirina serdan û hevdîtinên bi şêniyên herêmê re were xurtkirin, piştgiriya warê çandiniyê bê kirin.

Beşdaran destnîşan kir ku ji bo bidawîkirina şer û destwerdanên derve û ji bo ku gel armancên xwe pêk bîne, divê hewldanên ji bo xurtkirina eniya siyasî werin zêdekirin.

Beşdaran her wiha bal kişand ser xurtkirina têkiliyên di navbera beşên civakê de û berdewamkirina lidarxistina mîna van civînan.

(fr/c)

ANHA