​​​​​​​Şêniyên Helebê sersaxî ji malbeta şehîd Ehmed Seydo re xwestin

Ji bo endamê Hêzên Ewlekariya Hundrîn Ehmed Seydo yê ku di encama nexweşiyê de şehîd bû, konê sersaxiyê li Qada Heft Şehîdan a rojhilatê taxa Şêxmeqsûdê hat vedan. Bi sedan şêniyan herikîn bin kon û sersaxî xwestin.

Di bin kon de, bi navê Meclisa Giştî ya Taxên Şêxmeqûsd û Eşrefiyê, Hevserokê Komîteya aborî ya herdu taxan Selah Tirkî axivî û diyar kir ku serkeftina şoreşa 19ʹê Tîrmehê berhema keda şehîdan e. Selah Tirkî şervanên li eniyên berxwedanê silav kir.

Bi navê Hêzên Ewlekariya Hundirîn a Helebê, rêvebera hêzê Heyat Ebdo jî têkoşîna şehîdan bi ronahiyê ku tarî û zulmê radike wesif kir. Heyat Ebdo soza parastina destkeftiyên gelan da.

Bi navê Kongra Star endama Komîna Şehîd Rûken Zerdeşt, Cîhan Îbiş axivî û got: " Şehadet asta herî bilind a serbilindî, şeref û fedakariyê ye. Navê şehîd Ehmed wê di mejiyê hemû gelên herêmê de bimîne."

Cîhan Îbiş di dawiya axaftina xwe de soza şopandina rêya şehîdên berxwedana Bakur û Rojhilatê Sûriyê da.

Merasîm bi berzkirina dirûşmên dilsoziya bi şehîdan re bi dawî bû.

ANHA