Şêniyên herêma Efrînê cenazeyê şehîd Soro Çiya oxir kir

Bi sedan şêniyên herêma Efrînê li pêşiya nexweşxaneya Avrîn a navçeya Fafînê kom bûn û cenazeyê şervanê Hêzên Rizgariya Efrînê (HRE) Fehmî Mihemed (Soro Çiya) wergirt ku di 6`ê Kanûnê de di pêngava duyemîn a Berxwedana Serdemê de şehîd bûye.

Girseya gel, ber bi goristana şehîdên Berxwedana Serdemê ya li navçeya Ehresê ve ketin rê.

Li goristanê, endamê rêveberiya Meclisa Malbatên Şehîdan a herêma Efrînê Ebdulhenan Memo axivî û sersaxî da malbata şehîd û hemû şêniyên Efrînê.

Mamo wiha domand: “Destanên lehengiyê ku şehîdên me bi xwîna xwe xêz dikin, xeta pêşîn a parastina destkeftiyên şoreşê ye. Em dev ji vê xetê bernadin û heta ku Efrînê rizgar dibe dê berxwedanê berdewam bikin.”

Endamê meclisa kantona Efrînê Mihemed Şêx Qenber jî got: “Armanca dorpêça hikumeta Şamê ya li ser kantona Şehbayê, lawazkirina berxwedana me ye û ew dixwaze me ji rizgarkirina Efrînê dûr bixe. Em dev ji vê berxwedanê bernadin.”

Di dawiyê de endama Komîteya Perwerdeya Civaka Demokratîk (KPC-D) ya herêma Efrînê Rûken Ehmed wesîqeya şehadeta şehîd Soro Çiya xwend û radestî malbatê kir.

Paşê cenazeyê şehîd li goristanê hat veşartin.

ANHA