​​​​​​​Şêniyên Minbicê ji bo şermezarkirina êrişên kîmyewî yên li dijî gerîla xwepêşandan li dar xist

Duh Biryargeha Navenda Parastina Gel (NPG) nasnameyên 17 gerîla eşkere kirin ku di encama êrişên bi çekên kîmyewî yên dewleta Tirk a dagirker li dijî Herêmên Parastinê yên Medyayê de şehîd bûbûn.

Li hember sûcên dagirkeriya Tirk ên li Bakur û Rojhilatê Sûriyê de, bi sedan şêniyên Minbic û gundewarê wê bi xwepêşandaneke girseyî êriş û bêdengiya navneteweyî li hemberê şermezar kirin.

Xwepêşandan bi dirûşma “Werin Cenga Azadiyê” ji pêşiya çerxerêya Nezafe dest pê kir û li ber navenda Tevgera Ciwanên Şoreşger ên Sûriyê rawestiya û veguherî mitinê.

Li wir, hevserokê Tevgera Ciwanên Şoreşger ên Sûriyê ya Minbicê Ehmed El Cemîlî wiha axivî: “Em hedefgirtina hevalên me yên gerîla ji aliyê faşîzma Tirk ve bi çekên kîmyewî li çiyayên Kurdistanê şermezar dikin.”

El Cemîlî wiha lê zêde kir: “Ev serhildan, serhildana şêniyên Minbicê, ciwanên şoreşger û jinên ciwan a li hember êrişên dermirovî yên dagirkeriya Tirk ên li dijî Herêmên Parastinê yên Medyayê ye.”

El Cemîlî destnîşan kir ku divê gel bi tevahî bibe yek û piştgiriyê bide hêzên leşkerî û ji bo rojên pêş amade be, ji ber ku li pêşiya herêmê şerek bi dewleta Tirk a dagirker re heye ku dixwaze mêtingeriyê li gorî rêgeza xwe careke din pêk bîne û demografiya herêmê biguhere.

Di dawiya axaftina xwe de, El Cemîlî got: “Em ê yekitiya xwe bidomînin û rê nedin dagirkeran ku derbasî xaka me bibin, her wiha em ji çete û xayînan re dibêjin ku bi her dilopeke xwîna şehîdan, berxwedana me ya li ser şopa neteweta demokratîk û fikrê rêber Ocalan bilindtir dibe.”

(mh)

ANHA