‛Heta azadiya fîzîkî ya rêber Ocalan em ê têkoşînê xurt bikin’

Welatiyên Efrînê yên li kampên Şehbayê dijîn, bal kişand ser tecrîda girankirî ya li ser rêber Abdullah Ocalan û bang kir ku di demeke nêz de hevdîtin pê re bên kirin.

Fatme Beko da zanîn ku tecrîda li ser rêber Abdulah Ocalan li ser mirovahiyê bi giştî ye û got: “Em jin, em ê her tim li qadan bin da ku rêberê xwe bi fîzîkî azad bikin, ji ber ku azadiya rêber Apo azadiya jinan e. Her wiha heta Efrînê jî rizgar bikin em ê berxwedana xwe dewam bikin.”

Fatme Beko wiha domand: “Em ne tenê agahiyan dixwazin, lê belê azadiya fîzîkî ya rêber Apo dixwazin. Em ê heta nefesa dawîn a jiyana xwe ji bo azadiya rêberê xwe tê bikoşin.”

Fatme Beko bang li gel kir ku xwedî li rêber Abdullah Ocalan derkeve û wiha lê zêde kir: “Bila rêxistinên mafên mirovan şerm bikin û bi erka xwe rabin û qanûnan binpê nekin. Bila cîhan tevahî bizane em ji rêberê xwe bernadin, em ê her tim doza rêber Apo bişopînin û têkoşîna xwe di wê oxirê de bilind bikin.”

Welatiyê bi navê Osman Silêman jî têkildarî tecrîda li ser rêber Ocalan wiha got: "Her kes û dewletên ku cihê xwe di vê komploya li ser rêber Ocalan de girtiye, bi tundî şermezar dikin. Yê ku bi navê mafê mirovan bang dikin, tiştek ji mirovahiyê nas nekirine û eger nas kiribin jî nêzî 3 sal e tecrîdeke giran li ser Serokatî tê meşandin û nahêlin ne malbat ne jî parêzer rêber Ocalan bibînin. Li hember vê yekê tu helwest nîşan nedane.”

Ciwanê Efrînê bi navê Îbo Elî jî got teqez ew ê tecrîd were şikandin û wiha got: “Em ciwan hetanî azadiya fîzîkî ya rêber Apo pêk bê, dê xew li me heram be. Pêwîst e heyanî em agahî ji rêberê xwe bigirin, her kêlî li ser pêyan bin û bê navber tê bikoşin. Me bi ciwantî dest pê kir, em ê bi ciwantî bi ser bikevin.”

ANHA