Gelê herêmê di sibeha cejnê de serdana goristanên şehîdan kir

Her sal di roja yekemîn a cejnê de gelê Bakur û Rojhilatê Sûriyê, endamên Hêzên Ewlekariya Hundirîn, endamên Rêveberiyên Sivîl û Xweser û Meclisên Malbatên Şehîdan vê sibê serdana goristanên şehîdan kir.

Li goristanan malbatên şehîdan li ser giyanên ewladên xwe yên di oxira parastina herêmê ji êrişên DAIŞ`ê û artêşa Tirk a dagirker de canê xwe feda kiriye, ayetên Quranê xwendin.

HESEKÊ

Li bajarê Hesekê vê sibê şêniyên herêmê bi boneya cejnê berê xwe da Goristana Şehîd Dijwar a li gundê Dawûdiyê. Şêniyên navçeya Dirbêsiyê jî ber bi Goristana Şehîd Rustem Cudî ya li rojavayê navçeyê ve çûn.

Li navçeya Til Temir jî welatiyan berê xwe da goristana şehîdan.

Li Şedadê şêniyên herêmê ber bi goristana şehîdan ve çûn, li wir şervanên QSD`ê toreneke leşkerî li dar xist û ji fermandarên QSD`ê Zinarîn Hesen axivî û got: "Destpêkê em Cejna Remezanê li hemû malbatên şehîdan pîroz dikin û soza şopandina berxwedana wan şehîdên parastina xaka me kirin, didin. He wiha li gelê herêmê jî pîroz dikin û dibêjin heta rizgarkirina rêberê xwe û rakirina tola şehîdên xwe em ê tê bikoşin."

Zinarîn Hesen îşaret pê kir ku li dijî dagirkeriya Tirk û hevalbendên wê ew ê bi gel û hêza xwe ya leşkerî li ber xwe bidin.

MINBIC

Li bajarê Mibicê jî gel û şervanên Meclisa Leşkerî ya Minbicê, endamên Rêveberiya Sivîl, endamên saziyên sivîl berê xwe da goristana şehîdan.

ŞEHBA

Vê sibê bi sedan şêniyên herêma Efrînê serdana Goristana Şehîdên Berxwedana Serdemê ya li navçeya Ehres a kantona Şehbayê, kir.

Li goristana şehîdan, piştî deqeyek rêzgirtin, endama Meclisa Malbatên Şehîdan a kantona Efrînê Sureya Hebeş axivî û destnîşan kir ku girêdana bi axê ve, misogeriya rizgarkirina Efrîna dagirkirî ye. Sureya Hebeş diyar kir ku tevî şert û mercên zehmet ên koçberiyê jî, lê belê ew her tiştî tehmûl dikin da ku axa xwe ji dijminan rizgar bikin.

Sureya bi bîr xist ku yekitiya gelan çareya herî guncaw li hember planên dagirkeriyê ye.

HELEB

Bi sedan şêniyên taxên Şêxmeqsûd û Eşrefiyê, malbatên şehîdan, şervanên YPG/YPJ`ê û saziyên sivîl serdana Goristana Şehîdên Şêxemqsûd û Eşrefiyê ya li herêma Şiqeyf ya Helebê kir.

Li ser gorên şehîdan gul hatin danîn, hinekan ayetên Quranê xwendin, hinekan jî şêranî belav kir.

Li goristanê endamê Meclisa Malbatên Şehîdan Remzî Bekir, Cejna Remezanê li rêber Abdullah Ocalan, şehîdên azadiyê û hemû şervanên YPG/YPJ`ê pîroz kir.

Bekir destnîşan kir ku şehîd rêberên wan in û bi saya şehîdan ew îro di ewlehiyê de dijîn. Her wiha soz da ku ew ê hemû destkeftiyên bi saya fedekariyên şehîdan hatine bidestxistin, biparêzin.

Li aliyekî din, şênî û endamên saziyên sivîl û hêzên leşkerî berê xwe da Qada Şehîd “Ebû Şiyar” a li taxa Seken Şebabî ya Helebê.

Li wê derê jî endamê Kombûna Olan şêx Elî El-Hesen Cejna Remezanê li dayik, bav, zarok û hevjînên şehîdan û hemû şervanên li eniyên şer pîroz kir û got: “Cejn Efrîn e, inşallah cejna bê em ê li Efrînê bin.”

KOBANÊ

Li Kobanê jî welatiyan bi boneya cejnê serdana goristanan kir û Goristana Şehîd Dîcle ya li başûrê bajêr kir.

Welatiyan serdana Goristana Şehîdên Komkujiya Kobanê û goristana gundê Berxbotan kir.

KANTONA QAMIŞLO

Vê sibê bi sedan pêkhateyên bajar û navçeyên kantona Qamişlo, malbatên şehîdan, endamên saziyên civaka sivîl û Rêveberiya Xweser serdana gorên şehîdan kir.

Welatiyan serdana Goristana Şehîd Delîl Saroxan a li bajarê Qamişlo, Goristana Şehîd Xebat a li navçeya Dêrikê, Goristana Şehîd Dilşêr a navçeya Tirbespiyê û Goristana Şehîd Îsmaîl a navçeya Amûdê kir.

Hêzên Ewlekariya Hundirîn li kantonê gelek tedbîrên ewlekariyê girtin û hêzên xwe li pêşiya tevahiya goristanan bi cih kirine.

Li goristanan welatiyan cejna hev pîroz kir.

REQA, TEBQA Û DÊRAZOR

Piştî şêniyên bajarê Reqa, Tebqa û Dêrzorê nimêja cejnê kir, ber bi goristanên şehîdên ve çûn.

Piştî nimêjê şêniyên Reqayê ber bi goristana şehîdan a Reqayê ya li gundê El-Hikumiyê ve çûn. Şêniyên gundewarên rojhilatê Reqayê jî ber bi Goristana Şehîdên Sêvdar a li bajarokê El-Cidêdad ve çûn.

Li Tebqayê jî welatî ber bi goristana şehîdan a bajêr herikîn. Şêniyên rojavayê gundewarên Dêrazorê jî berê xwe da Goristana Şehîd Xidir El-Hemade ya li gundê Ebû Xeşeb.

Li goristanan endamên Meclisa Sivîl a Reqayê, endamên Rêveberiya Sivîl a Demokratîk a Tebqa, Partiya Sûriya Pêşerojê, QSD`ê, endamên Hêzên Ewlekariya Hundirîn, şêx û rûpsiyên eşîran, Meclisa Malbatên Şehîdan silav li malbatên şehîdan kirin ku canê xwe di oxira parastina welat de daye.

(ekîb)

ANHA