Li gelek bajaran şehîd Ezîz Ereb hat bibîranîn

Li gelek herêmên Bakur û Rojhilatê Sûriyê bi wesîleya salvegera 36'an a şehadeta Ezîz Ereb, merasîm hatin lidarxistin.

Meclisa Malbatên Şehîdan a Tebqayê şehîd Ezîz Ereb li Goristana Şehîdan bi bîr anîn. Endamên Desteya Kar û Barên Civakî ya Rêveberiya Xweser a Bakur û Rojhilatê Sûriyê, meclisên rêveber û qanûnsaz ên Tebqayê, malbatên şehîdan û saziyên sivîl û leşkerî tev li merasîma bibîranînê bûn.

Destpêka merasîmê şervanên QSD`ê toreneke leşkerî li dar xist, piştre bavê şehîd Ezîz Ereb axivî û got: "Kurê min ji pîvanên mirovahiyê hez dikir, lewma tev li Tevgera Rizgariya Kurdistanê bû û min jî ew teşwîqî vê xetê kir, ji ber ku tevgereke neteweyî ye û li ser bingeha exlaq, biratiya gelan û rizgarkirina wan ji qeyd û bendên bindestiyê hatiye avakirin."

Hesen Şêx Hesen ev li axaftina xwe zêde kir: "Divê hemû şervanên tevgerê rêya şehîd Ezîz û hemû lehengên niştimanparêz bişopînin, ji ber ku rastî ji çewtiyê cuda kirin û  tê koşiyan, her wiha parastina mafên gelan kirin. Ger em rêya şehîd Ezîz û hemû şehîdên azadiyê bişopînin serkeftin dê para me be."

Piştre malbata şehîd Ezîz mûm li pêşiya wêneyê wî vêxistin û li ser jiyana şehîd sînevîzyonek hate nîşandan.

Cîgirê Sekretêra Giştî ya Partiya Sûriya Pêşerojê Cahîd Hesen nameya şehîd Ezîz Ereb xwend. Merasîm bi sloganên "Berxwedan jiyan e û şehîd namirin" bi dawî bû.

MINBIC

Meclisa Malbatên Şehîdan a Minbic û Gundewarê wê merasîmê salvegera şehîd Ezîz Ereb û şehîd Rojîn Ereb li dar xist. Endamên meclisê, saziyên Rêveberiya Xweser a Sivîl a Demokratîk tev li merasîmê bûn.

Endamê Meclisa Malbatên Şehîdan a Minbicê Mihemed El-Şêx axivî û îşaret bi jiyana her du şehîdan kir û got: "Şehîd Ezîz Ereb û Rojîn Ereb ji bo azadiya gelê bindest tê koşiyan. Şehîd Ezîz Ereb piştî azadî, wekhevî û demokrasî di partiya rêber Ocalan de, dît tev li refên Tevgera Rizgariya Kurdistanê bûne."

Piştre li ser jiyana şehîd Ezîz Ereb û Rojîn Ereb sînevîzyonek hate pêşandan û nameyên wan hatin xwendin.

DÊRAZOR

Meclisa Malbatên Şehîdan a Hecînê merasîma bîranîna şehîd Ezîz Ereb li qada Meclisa Leşkerî ya Hecînê li dar xist. Bi dehan rûspiyên êlan, nûnerên saziyên sivîl, leşkerî û malbatên şehîdan beşdar bûn.

Di merasîmê de bi navê Meclisa Herêma Rojhilat Ebdulqehar El-Ebid El-Ehmed, berdevkê Meclisa Leşkerî Hogir Mihemed, bi navê Meclisa Malbatên Şehîdan Cabir El-Mixlef, Nivîsgeha Leşkerî Şemlan El-Şemlan axivîn.

Axêveran destnîşan kir ku şehîdan, ji bo pêkanîna biratiya gelan pirek ava kir û soza şopandina rêya şehîd Ezîz Ereb û şehîdên da.

Di dawiya merasîmê de hevserokê Meclisa Malbatên Şehîdan a Hecînê Rakan El-Ferîc kurtejiyana şehîd Ezîz Ereb û nameya wî xwend.

TIL HEMÎS

Meclisa Malbatên Şehîdan a navçeya Til Hemîsê, şehîd Ezîz Ereb  di salvegera 36`a a şehadeta wî de bi merasîmekê li goristana Şehîdan bi bîr anî. Endamên saziyên civaka sivîl û şêniyên navçeyên Til Birak û Til Hemîsê tev li merasîmê bûn.

Di merasîmê de endama rêveber a Meclisa Malbatên Şehîdan Mîdya Mihemed axivî û fedakariyên şehîdan silav kir û got: “Bi saya şehîdên mîna Ezîz Ereb em jiyaneke rûmet dijîn.”

Beşdarên merasîmê soza berdewamkirina têkoşînê heta pêkanîna azadî û demokrasiyê da.

Hêjeyî bibîrxistinê ye ku şehîd Nadir Şêx Hesen (Ezîz Ereb) yekemîn ciwanên pêkhateya Ereb e ku sala 1983`yan tev li Tevgera Rizgariya Kurdistanê bûye û di 17`ê Nîsana 1986`an de şehîd bûye.

(eh-şx)

ANHA