Şêniyên Tebqayê êrişên dewleta Tirk ên li dijî Kobanê şermezar kirin

Îro bi sedan şêniyên Tebqayê meşiyan û êrişên dewleta Tirk a dagirker ên li ser Kobanê û hedefgirtina sivîlan şermezar kirin. Her wiha piştrast kirin ku ew bi QSD`ê re ne.

NÛÇE

13 ÇILE, 2022 13:59

TEBQA

Îro bi sedan şêniyên bajarê Tebqayê, endamên saziyên sivîl, meclisên leşkerî, siyasî, rûspî û endamên Tevgera Ciwanên Şoreşger a Sûriyê, Yekitiya Jinên Ciwan meşiyan.

Meş ji ber avahiya nivîsgeha Kombûna Jinan a Zenûbiya dest pê kir û li ber Navenda Çand û Hunerê rawestî.

Bi navê Rêveberiya Sivîl a Demokratîk a Tebqayê hevserokê Meclisa Qanûnsaz û şêxê qebîleya El-Welde Hamid El-Ferec axivî û got: “Dewleta Tirk çi dike bila bike, lê nikare vîn û israra me bişikîne. Em ê li hember derbeyên wê yên nerewa û siyasetên wê yên dijminane li ber xwe bidin.”

Endamê Meclisa Malbatên Şehîdan Mihemed El-EReb jî got gelên herêmê bi Hêzên Sûriya Demokratîk (QSD) re ne.

Her wiha bi navê Nivîsgeha Kombûna Jinan a Zenûbiya, Macîde El-Kerîm axivî û êrişên dewleta Tirk a dagirker ên li dijî sivîlan şermezar kirin. Macîde El-Kerîm bang li civata navneteweyî kir ku gavên cidî biavêje da ku êrişên dewleta Tirk a dagirker ên li dijî herêmê rawestînin û ji ber sûcên li herêmê kirine, hesab jê bixwazin.

(şx)

ANHA