Şêniyên Kobanê sersaxî da malbata şehîd Mesûd Îbrahîm

Bi sedan şênî, endamên Meclisa Malbatên Şehîdan a herêma Firatê û endamên saziyên Rêveberiya Xweser berê xwe da gundê Zirafkê yê li başûrê Kobanê û sersaxî ji malbata şehîd Mesûd Îbrahîm re xwest.

Şêniyên Kobanê ji aliyê malbata şehîd ve hatin pêşwazîkirin, piştre ji rêveberên Meclisa Malbatên Şehîdan a navçeya Şêranê Ismaîl Ismaîl got: "Ew ne şehîdê me yê yekemîn bû û ne jî wê yê dawiyê be, ji ber ku dijminê Tirk ciwanên me dike hedef. Nêzî 3 mehan e ku çalakvan li nêzî deriyê Sêmalka çalakiya xwepêşandanê didomînin û daxwaza wergirtina cenazeyên şehîdan dikin, Lê heta niha cenazeyên wan nehatine wergirtin."

Ismaîl siyaseta dijminane ya PDK’ê şermezar kir û got: "Em hebûna wan kesên ku xwe wek Kurd dibînin û di hedefgirtina ciwanên me de alîkariya dijmin dikin, şermezar dikin."            

Ismaîl Ismaîl di dawiya axaftina xwe de got: "Ev komkujiya ku li Kobanê pêk hatiye, bi destê xayînan pêk hat, lê xwîna şehîdên me dê vala nece. Şoreş, fikir û felsefeya rêber Abdullah Ocalan dê her tim bi pêş ve biçe û em ê rêya şehîdan bişopînin."

Şehîd Mesûd Îbrahîm yek ji wan birîndaran bû ku di 25'ê Kanûnê de li bajarê Kobanê ji aliyê balafireke bêmirov a artêşa Tirk ve hatibû hedefgirtin û di encamê de 5 endamên Tevgera Ciwanên Şoreşger û Yekitiya Jinên Ciwan şehîd bûbûn.

(dx)

ANHA