Fîlma ‘Ji bo Azadiyê’ çima di Mîhrîcana Fîlman Silêmaniyê de hate qedexekirin?

Li ser xwesteka organîzatorên mîhrîcan û rêveberiya wê û piştî temambûna şertên mîhrîcanê, Komîna Fîlm a Rojava bi fîlma "Ji bo Azadiyê" ku li ser çîroka berxwedana gelê Kurdistanê yê li Amedê ya li dijî dagirkeriya Tirk diaxive, beşdar bû.

Dihat payîn duh saet 22:00’an fîlm di mîhrîcanê de bihata pêşandan. Lê ji aliyê organîzatorên mîhrîcanê ve hate ragirtin. Piştî ragirtina fîlmê, Komîna Fîlm a Rojava bi daxuyaniyekê ragihand ku ji ber mîhrîcan ne platformeke çandî ya azad e, ew fîlmên xwe ji mîhrîcanê dikişînin jê jî fîlmê ‘Dema Dirîreşkan`.

Têkildarî sedemên qedexekirina pêşandana fîlmê ji hêla organîzatorên mîhîrcanê ve, çêker û alîkarê derhêner Diyar Hiso ji ajansa me re îdiayên organîzatorên mîhrîcanê nirxandin û got: "Organîzatoran îdia kir ku fîlm kevn e û di 2019’an de hatiye çêkirin. Lê organîzatoran ji destpêkê ve dîroka fîlmê dizanî û di şertên pêşendana fîlman de tu şert têkildarî dîroka fîlmê tune bû."

Girêdayî qedexekirina pêşandana fîlmê Diyar Hiso wiha domand: "Piştî qedexekirina fîlmê, me fîlm ji mîhrîcanê kişand. Her wiha me 2 fîlmên din jî ji mîhrîcanê yên bi navên "Dema Dirîreşkan" û "Ronak" kişandin. Ji ber ku eşkere bû ku ew zexteke derve ye."

Hiso da zanîn ku ev cara duyemîn e ku pêşandana fîlman li Silêmaniyê tê qedexekirin, ji ber di 2019’an de jî ev yek pêk hat û wiha pê de çû: "Wê demê berpirsên îdia kir ku fîlmê zirarê digihîne ewlehî û aştiya bajêr. Gelo têkiliya ewlehiya bajêr bi naveroka fîlmê ku li ser berxwedana ciwanên Kurd li Amedê li hember dagirkeriya Tirk diaxive çi ye?”

Serokatiya parêzgeha Silêmaniyê û hêzên Asayîşê yên girêdayî wê di 31’ê Kanûna 2019’an de di çarçoveya bernameya pîrozbahiyên sersala nû de nehişt fîlma ‘Ji bo Azadiyê’ di sînemaya Salim a li Silêmaniyê ya Başûrê Kurdistanê de were pêşandan.

Hiso piştrast kir ku qedexekirina fîlmê, li ser hêza fîlmê nîşaneyek e ku dê bandoreke erênî li ser gelan bikira û ev tişt got: "Qedexekirina fîlmê ji ber zextên siyasî bû. Ji ber naveroka fîlmê li ser berxwedana Rêveberiya Xweser, gel û vîna wê ya li dijî dewleta Tirk a dagirker bû. Ji bo me diyar bû ku ew bi xwe dijminên berxwedana kurdistiyan e.”

Têkildarî bandorên neyênî yên piştî van biryarên nedurist ên li ser pêşeroja çand û sînemayê Hiso da zanîn ku dê ev biryar bandorên neyênî bikin. Ji ber mîhrîcanên çandî yên sînemayê girîng in, aliyên rasteqîn ên jiyanê eşkere dikin û heman demê berxwedana gelan eşkere dikin.

Hiso der barê bandor qedexekirina pêşandana fîlmê di mîhrîcanê de ev tişt anî ziman: "Dê ev yek bandoreke neyînî li navê mîhrîcanê û duristbûna wê di pêşerojê de bike. Her wiha dê bandorê li ser pabendîbûna organîzatorên wan bi biryar û şertên tevlêbûn, zelalbûna mîhrîcanê bike. Ji ber îro nehiştin Komîna Fîlm a Rojava fîlma xwe pêkêş bikin, dê sibe fîlmeke din qedexe bikin û bi vî awayî dê fîlmên li gorî xwestekên xwe qedexe bikin."

Hiso piştrast kir ku dê ev yek demeke dirêj bandorê li asoyên çandî yên gelê Kurd bike û bibe piştevanê têkçûna çandê. Ji ber ku yekser dikeve xizmeta dijminên gelên Kurdistanê. Her wiha Hiso rêveberiya mîhrîcana Silêmaniyê rexne kir û ew bi binpêkirina biryar û şertên wê wesifand.

Diyar Hiso bang li rêveberiya mîhrîcan û organîzatorên wê kir ku têkildarî qedexekirina pêşandana fîlmê daxuyaniyekê bidin raya giştî ya Kurdistanê û sedemên wê eşkere bikin.

Çêker û alîkarê derhêner Diyar Hiso di dawiyê de got wan bi rêya daxuyaniyekê helwesta xwe nîşan da û hin sînemavanan jî ev yek rexne kir. Diyar Hiso da zanîn ku ew hewl didin ev helwest dubare nebe da ku çanda Kurdistanê dewlemendtir bibe.

(fr)

ANHA