Malbatên şehîdan ên Efrînê vekirina goristana şehîdan şermezar kir

Bi hezaran malbatên şehîdan ên herêma Efrînê û şêniyên navçeya Ehrisê, bi meşekê bêrêziya dewleta Tirk û çeteyên wê yên li goristanên şehîdan şermezar kirin û bang li civaka navneteweyî kirin ku destwerdanê bikin, cenazeyên şehîdan vegerînin û hesab ji dewleta Tirk û çeteyên wê bixwazin.

Meş li qada navçeya Ehrisê dest pê kir. Di meşê de wêneyên şehîdan, wêneyên rêber Abdullah Ocalan û alên Meclisa Malbatên Şehîdan hatin hildan.

Meşa ku di kolanên sereke yên navçeyê de geriya bi berzkirina diruşmeyên dilsoziya bi şehîdan re û silavkirina Berxwedana Serdemê ber bi goristana Şehîdan ve çû.

Li goristanê ji bo bîranîna şehîdên azadiyê deqeyeke rêz hate girtin. Bi navê Meclisa Malbatên Şehîdan Hacer Meho axivî û got, dema êrişên dewleta Tirk ên li ser kantona Efrînê wan şehîdên xwe bi rûmet û bi merasîmeke bi heybet oxir kirin û diyar kir ku piştî Efrînê dagir kir hewl didin rastiya berovajî bikin û goristanên şehîdan ji holê rakin.

Hacer diyar kir ku dagirkeriya Tirk îdia dike ku goristana ku li piş nexweşxaneya Avrînê dîtine goreke komî ye ku  YPG û YPJ'ê pêk aniye û wiha domand: "Ma gelo di gorên komî de qurbanî bi kefen û bi awayekî rêxistinkirî têne veşartin!"

Hacer Meho diyar kir ku li gel wan wêne û belge hene îsbat dikin ku goristan a zarokên wan ên şehîdan in.

Hacer soza şopandina rêya şehîdan da û got: "Bêyî zarokên xwe em dikarin bijîn, lê em nikarin bê rûmet bijîn, şehîdên me rûmet û nirxên me yên manewî ne."

Di dawiya axaftina xwe de Hacer Meho bêdengiya civaka navneteweyî ya li hemberî sûcên dewleta Tirk ên li Efîrnê şermezar kir û xwest ku tavilê cenaze radestî malbatên şehîdan werin kirin.

Endamê Meclisa Malbatên Şehîdan Hesen Hesen jî diyar kir ku bêdengiya li hemberî sûcên dewleta Tirk û çeteyên wê cesaretê dide Tirkiyê da ku binpêkirinên xwe yên dermirovî li Efrîna dagirkirî zêde bikin.

Hesen diyar kir ku şervanên YPG, YPJ û QSD'ê ji bo parastina xaka Efrîna pîroz şehîd bûn û destdirêjiya li goristanên şehîdan delîlê kîn û wehşiyeta dewleta Tirk a li hemberî kurdan û cenazeyên şehîdên wan e.

ANHA