Kedkarê çapemeniya azad Mistefa Mihemed hat bi bîranîn

Îro 18`ê Tîrmehê salvegera 5`emîn a şehadeta rojnamevan û nûçegihanê Ronahî Tv Mistefa Mihemed e. Mistefa Mihemed dema pêngava rizgarkirina bajarê Minbicê 2016`an dişopand, gihaşt asta şehadetê.

Bi dehan rojnamevan, hevalên şehîd û malbata wî Mistefa Mihemed li ser gora wî ya li goristana Şehîd Dicleyê bibîr anîn.

Merasîm bi rêzgirtinê dest pê kir, piştre endama Ajansa Jinê (JINHA) a li Kobanê Dilûcan Bozê axivî û got:"Şehîd Mistefa yek ji têkoşerên ku ji bo dengê rastiyê û dengê şoreşa gelan a Bakur û Rojhilatê Sûriyê bigihîne cîhanê kar û xebat kir."

Dilûcan Bozê destnîşan kir ku şehîd Mistefa Mihemed bi raporên xwe piştgiriya şoreşa jinê û azadiya wê dikir, di heman demê de hewl dide maf û azadiya jinan misoger bike.

Dûvre serokê Edîtoriya Kovara Şeriq El-Ewsat El-Demokratî Selah Muslim axivî û soza şopandina rêya şehîd Mistefa û tevahiya şehîdên azadiyê da û ev lê zêde kir:"Şehîd Mistefa dem û jiyana xwe ji bo rastiyê bigihîne civak û cîhanê veqetand û ji bo xizmeta welatê xwe tucarî dudilî nedibû."

Dayika şehîd Mistefa bixêrhatina beşdaran kir û ev dirêjî da gotina xwe: "Min kurê xwe wenda kir, lê bi dehan keç û xortên li ser şopa şehîd Mistefa ne, kurê min di dil û bîra me de zindî ne."

Piştî axaftinan, beşdaran li gora şehîd Mistefa mûm vêxistin, piştre serdana gora nûçegihana me şehîd Dilîşan Îbiş kir

(eh)

ANHA