Partiya Sûriya Pêşerojê li ser zanebûna siyasî komxebatek li dar xist

Meclisa Partiya Sûriya Pêşerojê ya Efrîn û Şehbayê, bi navê "Zanebûna siyasî ya civakî li gel pergala nû ya cîhanî" komxebateke diyalogê li dar xist.

11 tîrmeh, 2021 16:47

ŞEHBA

Komxebat li navenda partiyê ya navçeya Fafînê bi amadebûna nûnerên partiyên siyasî, Kongreya Star, Meclisa Malbatên Şehîdan, Yekitiya Rewşenbîran û rûspiyên eşîrên herêmê hate lidarxistin

Di komxebatê de du mijar hatin nîqaşkirin; Zanebûna siyasî û di çarçoveya projeya demokratîk de çareserî.

Komxebatê bi rêzgirtinê dest pê kir, piştre endama Nivîsgeha Jinan a Partiya Sûriya Pêşerojê

Meryem têkildarî mijara yekemîn a komxebatê behsa girîngiya siyasetê ya di jiyana rojane de û çawa ku dewletên kapîtalîst siyasetê ji bo xizmeta ajandeyên xwe bi kar tînin, kir.

Mijara duyemîn a bi navê "Di çarçoveya projeya demokratîk de çareserî" ji aliyê endamê Meclisa Partiya Sûriya Pêşerojê ya Efrîn û Şehbayê Mihemed Weys ve hate nirxandin. Di vê mijarê de bal hate kişanidn ser girîngiya avakirina civaka demokratîk, piştgiriya projeyên ku xizmeta civakê dikin û li dijî kapîtalîstê disekinin. Her wiha banga parastina nirxên mirovahî û şaristaniya wê hate kirin.

Beşdaran li ser her du mijaran nêrînên xwe anîn ziman. Di dawiyê encamnameya komxebatê ji aliyê endamê Meclisa Partiya Sûriya Pêşerojê ya Efrîn û Şehbayê Mihemed Beyrem ve hate xwendin.

Encamname wiha ye:

"Ji baweriya me ku zanebûna siyasî hêmanekî sereke yê pêşketina gelan û bidestxistina azadiya wan e, erka me wekî kesayet, partî û sazî avakirina nifşekî zane ye ku ji bûyerên ku li derdorê diqewimin û bandorê li çarenûsa gelê me dike, têghiştî be. Zanebûna siyasî bi dûrketina ji teqlîdê û dûrketina ji siyasetên heyî yên dewletan ku wêneyeke ne rast li ser siyasetê parve dikin, tê avakirin. Ji bo parastina destkftiyê me, divê destek ji saziyên siyasî, civakî û çandî were pêşkêşkirin. Her wiha divê em li hemberî planên dagirkeriyê yên ku fikirê tundraw û şofînist belav dikin, bibin bend û projeya xwe ya demokratîk a pirrengî xurt bikin.

Di encamên nîqaşan de, em gihiştin ku pêwîste ev xal werin pêkanî:

1-Li dijî belavkirina fikirên tundraw û nijadperest û ji rakirina hişmendiya desthilatdariyê divê xebatke cîdî were meşandin.

2-Diviê rêgeza zanist di destên civakê de be û tevahiya derfetên pêşketinê werin misogerkirin, da ku cemawer pêş bikeve û xurtir bibe.

3-Tevahiya pêwîstiyên çandî û fikirî ji hemû beşên civakê re werin peydakirin da ku aloziyê xetimandina fikirî were derbaskirin.

4-Siyaseteke zanistî ku li gorî rêgeza ku tevahiya beşên civakê nêrîna xwe di qada siyasî de bidin, were meşandin.

5-Siyaset ji çand û exlaq neyê veqetandin.

6-Rêbazê siyaseta heyî ya ji aliyê desthilata navendî ve were şikandin û zanebûna siyasî were pêşxistin.

7-Têkiliyên civakî, zanebûneke siyasî li ser bingeha biratiya gelan a di çarçoveya neteweya demokratîk de pêwîst dike.

8-Bi rêya van çalakiyan em dikarin li dijî hegemoniya cîhanê bisekine ev jî bi rêya xurtkirina neteweya demokratîk misoger dibe.

Li ser vê yekê erka tevahiya saziyên me yên civakî û siyasî ye ku di aliyê siyasî xwe pêş bikeve ."

(eh)

ANHA