Li Minbicê ji bo ximzeta 130 gundan geracek hat vekirin

Vekirina geracê vê sibehê bi merasîmekê hate ragihandin û bi dehan şêniyên bajêr û endamên saziyan beşdar bûn. Geraca ku hatiye vekirin, têra nêzî 400 erebeyan dike û dê bikeve xizmeta 130 gundên başûr û rojavayê Minbicê.

Ji destpêka Cotmehê ve li ser projeyê xebat hebû û cihê geracê li taxa başûrê Minbicê ye.

Hevserokê Meclisa Rêveber a bajarê Minbicê Mihemed Xêr Şêxo wiha axivî: “Vekirina vê geracê û şopandina projeyên Komîteya Şaredariyan, li gel şert û mercên zehmet ku herêm tê re derbas dibe, pêk tê da ku em îspat bikin ku armanca me ya sereke peydakirina pêdiviyên welatiyan e.”

Hevseroka Komîteya Şaredariyan a Minbicê Bêrîvan Derwêş jî wiha got: “Ji destpêka avakirina saziyên Rêveberiyê ve, Gerînendetiya Veguhastinê li Minbicê plan kir ku tevgera geracan bi rêxixistin bike.”

Her wiha endamê rêveber ê Gerînendetiya Veguhastinê Mistefa Berkel diyar kir ku gerînendetiyê demeke berê gelek xebat pêk anîn wekî amadekirina hemû geracên li bajêr û avakirina geracê li dergeha Ewn Dadet, geraca Ebû Kehif û amadekirina qadên kamyonan.

Berkel destnîşan kir ku ev gerac ji bo yekkirina rawestgeha hemû erebeyên gundewarên başûr girîng e û wiha domand: “Ji ber ku ew erebeyên gundewarên başûr li kolanên sereke, kolanên şaxî û li çerxerêyan disekinîn, li navenda bajêr qerebalix çêdibû.”

(cx)

ANHA