Gelo nuqteyên bi çavdêriya Rûsyayê êrişên dewleta Tirk radiwestînin lê na?

Dewleta Tirk a dagirker piştî ku êrişa wê ya bejahî di 23`yê Mijdarê de li dijî Eyn Îsayê ji hêla Hêzên Sûriya Demokratîk (QSD) ve hate şikandin û di encamê de 18 çete hatin kuştin, asta êriş û topbarana xwe li dijî taxên Eyn Îsayê û gundên din ên li rojavayê wê zêde kir.

Ruxmî belavbûna hêzên hikumeta Şamê û Polîsa Leşkerî ya Rûsyayê li eniyên şer ên li bajarokê li gorî lihevkirina agirbestê ya Soçiyê ya di navbera Enqere û Moskovayê de, lê Rûsya topbarana ku di encamê de 4 sivîl hatin kuştin û 14 din jî birîndar bûn, paşguh dike.

`NUQTEYÊN LEŞKERÎ YÊN HEVBEŞ JI BO ŞOPANDINA AGIRBESTÊ NE`

Meclisa Leşkerî ya Girê Spî di 9`ê Kanûnê de ragihand ku bi hikumeta Rûsyayê re li ser avakirina 3 nuqteyên çavdêr ên hevbeş lihev kiriye.

Nuqteyek li rojhilatê bajarokê bi 3 kîlometran, yek din li rojavayê wê bi heman dûrbûnê û ya sêyemîn li nava taxên li bakurê Eyn Îsayê hatin avakirin. Yeknîneyên Hêzên Meclisa Leşkerî ya Girê Spî û hêzên hikumeta Şamê bi çavdêriya Rûsyayê li wan nuqteyan belav bûn.

Li aliyekî din hîlokopterên Rûsyayê piştî rawestandina topbaranê, li ser dirêjahiya eniyên şer di dirêjahiya 5 rojan de, geriyan.

`BÛYERÊN DERBASBÛNA VEŞARTÎ TÊK ÇÛN Û TOPBARAN JI NÛ VE DEST PÊ KIR`

Şervanên Hêzên Sûriya Demokratîk (QSD), duşema borî piştî çend rojan ji avakirina nuqteyên hevbeş, êrişeke bejahî ya çeteyên dewleta Tirk a dagirker li nêzî Meilekê li bakur rojavayê bajarokê Eyn Îsayê têk bir.

Di kêmtirî hefteyekê de, ev cara sêyemîn e ku çeteyên dewleta Tirk a dagirker hewl dan derbasî herêmê bibin da ku gundê Meilekê dagir bikin, rêya navneteweyî kontrol bikin û rê di navbera bajarokê Eyn Îsa û kantona Kobanê de qut bikin.

Piştî êrişan, artêşa Tirk a dagirker derdora bajarokê ji aliyê bakur ve, gundên Meilek, Sayde, Hoşan, Xaldiye û Kampa Eyn Îsayê topbaran kirin.

`XWEPÊŞENDANÊN LI PÊŞIYA BAREGEHA RÛSYAYÊ LI EYN ÎSAYÊ`

Ji ber wan êriş û topbaranê û bêdengiya Rûsyayê li hemberî wan êrişan, bi hezaran şêniyên herêma Firatê, bajarên Tebqa, Reqa û Minbicê li pêşiya mezintirîn baregehên Rûsyayê li bajarokê çalakiyek protestoyî li dar xist û hevkariya Rûsyayê bi êrişên dewleta Tirk re şermezar kir.

`RÛSYA ROLA KU TÊ XWESTIN NALÎZE`

Fermandarê Meclisa Leşkerî ya Girê Spî Riyad El-Xelef destnîşan kir ku dewleta Tirk a dagirker valahiya ji ber helwestên navneteweyî yên ne cidî derketiye, bi kar tîne û sûcan li Sûriyê pêk tîne. El-Xelef destnîşan kir ku ew ê herêmê biparêzin û ew mafê wan ê rewa ye.

El-Xelef diyar kir ku Rûsya garantorê agirbestê li herêmên şer ên di navbera QSD û artêşa Tirk a dagirker de ye, lê bi rola ku tê xwestin ranabe.

(şx)

ANHA