Li kampa Waşûkanî sersariya rêxistinên mirovî didome

Kampa Waşûkanî 12 km dikeve rojavayê navenda bajarê Hesekê û li bajarokê Tiwênayê ye, li kampê zêdetirî 12 hezar koçber dimînin. Heyva Sor a Kurd zehmetiya tunebûna taqîgehan (laboratuor) û kesên pispor ên di rêxistinan de dikişînin.

Li navenda Heyva Sor a Kurd a li kampê odeya hundirîn, odeya jinan, zarokan, destwerdanên lezgîn, perwerdeyên tibî, şêwirên derûnî, dermanxane û pêşwaziyê hene. Rêxistinên li kampê nexweşan dişînin navenda Heyvê, ji ber pispor û ambulans tune ne.

Heyva Sor a Kurd rojane zêdetirî 9 nexweşan dişîne nexweşxaneyên Hesekê û Til Temirê, ev yek jî barê qada tenduristiyê ya navenda Heyva Sor a Kurd girantir dike.

Endama rêveber a Heyva Sor a Kurd a li kampê Cîhan Amir ji ANHA’yê re axivî û got wan ji bo li kampê Koronavîrus belav nebe gelek tedbîr girtine. Ji van tedbîran çûn û hatina li kampê û kombûn qedexe kirine, lê dema pêwîstiya koçberan bi nan an jî avê hebe, dikarin derkevin.

Cîhan Amir bal kişand ser hewcedariya nuqteya wan a tibî û wiha axaftina xwe domand: "Piştî li tevahiya herêmên Bakur û Rojhilatê Sûriyê Koronavîrus berbelav bû, pêwistiya bi taqîgehan zêde bû, ji ber rojane em zêdetirî 5 nexweşan ji kampê dişînin nexweşxaneyên Hesekê yan jî Til Temirê û li wir tehlîlên xwe çêdikin."

Hin rêxistinan beriya çend mehan soz dabû Heyva Sor ku ew ê taqîgehan pêşkêş bikin û odeyek ji bo taqîgehê amade kir, lê heta niha ev soz bi cih nehatiye û heta tu rêxistinan jî laboratuor pêşkêş nekirin.

Cîhan Amir bang li aliyên peywendîdar kir ku di demeke wiha de ku Koronavîrus li herêmê berbelav e, alîkariya kampê bikin û pêwîstiyên tibî pêşkêş bikin.

60 ENDAMÊN TENDURISTIYÊ 24 SAETAN LI KAMPÊ DIXEBITIN

Li Heyva Sor a Kurd a li kampê bi awayekî nobetdarî 60 endam dixebitin, hin ji wan dewamê îdarî dikin û li odeyan dewam dikin. Her wiha rojane 30 endam dewam dikin û ji wan deh endam li odeya perwerdeyê de dimînin û li nava kampê digerin.

Heyva Sor a Kurd ji Cotemeha 2019`an de bi rêya klînîkên gerok 24 saetan pêwîstiyên tibî ji koçberan re dabîn dikin û piştî hejmara koçberan zêde bûye, navendeke tibî ku ji gelek odeyan pêk tê, vekir.

(eh)

ANHA