Navendeke şaxî ya Meclisa Navçeya Şêrawayê hate vekirin

Meclisa Navçeya Şêrawayê ji bo 6 gundên dorpêçkirî yên girêdayê wê "Burc Qas, Başimra, Kilutiyê, Zewq El-Kebîr, Meyasê û Zirneîtê" navend vekir.

Navend bi armanca birêxistinkirin şêniyan û çareserkirina pirsgirêkên wan li gundê Burc Qasê bi merasîmekê hate vekirin.

Merasîm bi deqeyeke rêzgirtin dest pê kir, piştre endamê Meclisa Malbatên Şehîdan a kantona Efrînê Xêro Îbrahîm axivî û bal kişand ser girîngiya vekirina navenda meclisê ji bo çareserkirina pirsgirêkan û peydakirina pêdiviyan ji şêniyên gund.

Îbrahîm got: "Meclis hate vekirin da ku xizmeta şêniyên navçeya Şêrewa ya ku ji 2 sal û nîvan ve dorpêçkirî ye, bike. Meclis wê bibe cihê lihevcivîna gel da ku rihê welatparêziyê xurt bike û pirgirêkên xwe li wir çareser bikin. "

Endama Kongreya Star a kantona Efrînê Zeyneb Seydo jî bang li jinan kir ku cihê xwe di meclisê de bigirin û wiha bi lêv kir: " Ji niha û pê ve divê hemû jinên navçeyê berê xwe bidin navenda meclisê û cihê xwe tê de bigirin û perwerde bibin da ku xizmetguzariya xwe û civakê bikin". 

Piştî axaftinan, deriyê navendê ji aliyê dayikên şehîdan ve hate vekirin.

Merasîm bi gerandina xelekên dîlanan li ber stranên gelerî yên efrînî bi dawî bû.

(rm)

ANHA