Mayinên DAIŞ’ê xewna Fatmaya 12 salî jî asteng kir

Dema ku Hêzên Sûriya Demokratîk (QSD) gundewarên Dêrazorê ji DAIŞ`ê rizgar kirin, DAIŞ`ê bi zanabûn bi hezaran mayin çandin da ku sivîl ber bi herêmên rizgarkirî ve dernekevin. Mayinên DAIŞ`ê bûn sedema ku gelek şênî lebatên xwe winda bikin.

Kiryarên DAIŞ`ê bûn sedem ku bi sedan şênî jiyana xwe bi awayekî astengdar berdewam bikin.

Fatme El-Ehmed 12 salî ye. Malbata wê ji 7 kesan pêk tê. Li herêma Çerxerêya Kargehan dimîne. Ev herêm wek nuqteya cudakirina her du gundewarên Dêrazorê yên rojava û rojhilatê tê hesibandin. Bi xwe ji gundê Hatla yê di bin kontrola hikumeta Sûriyê de koçber bûye. Beriya ji herêmê derkeve mayineke çeteyên DAIŞ`ê pê ve teqiya. Di encamê de her du lingên wê qut bûn.

Dayika Fatme Suad El-Ehmed behsa bûyerê dike û dibêje: "Di sala borî de Fatma tevî xizmên xwe pez dibir mêrgê. Li wir cismek biyanî dît. Lê nezanî çi ye. Dema nêz dibe û hewl dide bilivîne hema pê ve diteqe û lingên xwe winda dike. Piştî ku şêniyên herêmê dengê teqînê bihîstin, bi lez çûn cihê bûyerê û ew rakirina navenda  tenduristiyê ya Mihêmîdê. Lê ji ber derfetên kêm û rewşa wê ya krêtîk ew rakirin nexweşxaneya Hesekê."

Suad El-Ehmed bi rêya ANHA’yê bang li rêxistinên mirovî û navneteweyî kir ku alîkariya keça wê bikin.

Astengdariya Fatmayê, bandor li xwendina wê jî kir. Niha ew nikare biçe dibistanê, ew jî dilê wê disoje. Fatma dibêje: "Ez dixwazim vegerim dibistanê. Ez dixwazim xewna xwe pêk bînim. Ez dixwazim bibim mamoste. Lê beriya wê ez dixwazim bimeşim û bi zarokan re bilîzim."

Fatme hêvî kir ku rêxistinên tenduristiyê alîkariya wê bikin da ku xewna xwe pêk bîne û lebatên çêkirî bi kar bîne da ku dîsa di nav kolanên xwe de bimeşe û mîna zarokan biçe dibistanê.

(şx)

ANHA

<iframe width="560" height="315" src="https://www.youtube.com/embed/a4mjqfWAr4M" frameborder="0" allow="accelerometer; autoplay; encrypted-media; gyroscope; picture-in-picture" allowfullscreen></iframe>