Komîteya Aborî ya Reqayê navendên wergirtina genim amade dike

Komîteya Aborî ya girêdayî Meclisa Sivîl a Reqayê amadekariyên wergirtina hilberîna genim dike. Ji aliyekî din ve hin tedbîr ji bo wergirtina hilberînê ji cotkaran girtin.

30 nîsan, 2020 08:15

REQA

Desteya Aborî ya Bakur û Rojhilatê Sûriyê piştî nirxandina lêçûna rastîn a çandina hilberînê, buhayê kirîna kîloya genim bi 225 lîreyên Sûriyê diyar kir. Komîteya Aborî ya Meclisa Sivîl a Reqayê bi rêya navendên xwe yên ku li Reqa û gundewarên wê, semad, derman, tov û mazot ji cotkaran re pêşkêş dike.

Komîteyê sê navendên nû ji bo depokirina hilberîna genim amade kirin; depoyên Şinîne, Kebiş û Kalta. Berê jî sê depo hebûn; Bedir, Rafqa û Sehlebiye. Her wiha depoyên El-Bû Asî li gundewarên Tebqayê ne ku dikare 100 hezar ton genim depo bike. Hilberîna genim a îsal bi derdora 200 hezar ton hate texmînkirin.

Hevserokê Komîteya Aborî Reşad Kerdo diyar kir ku komîteyê kadroya rêveber a pêwîst ji bo çavdêriya prosesa wergirtina hilberînê di 6 depoyan de, amade kiriye. Kerdo destnîşan kir ku di destpêkê de dê kar belavî ser sê navendan bikin; Kebiş li gundewarên bakur, Bedir li gundewarên rojhilat û Sehlebiye li gundewarên rojavayî Reqayê. Piştre dê hilberîna genim di sê navendên din de pêşwazî bikin û bi çavdêriya Komîteya Aborî ya Tebqayê dê hilberîna genim di navenda El-Bû Asî wergire.

Kerdo wiha domand: “Em hewl didin tevahiya hilberîna genim ji cotkaran bikirin da ku depoyeke stratejîk ku têra Reqa û Tebqayê dike, dabîn bikin.”

Kerdo diyar kir ku di sala borî de aşên Reqa û Tebqayê 90 hezar ton genim kirin ard û dan firinan. Her wiha 10 hezar ton genim weke tov hatin peydakirin û firotin cotkaran.

Hevserokê Komîteya Aborî texmîn dike ku qerebalixa ku di salên borî de ji ber tunebûna navendên wergirtina hilberînê çêbûye, dê îsal çênebe.

(şx)

ANHA