Desteya Tenduristiyê biryara girtina 7 nexweşxaneyên li Qamişloyê taloq kir

Desteya Tenduristiyê ya Herêma Cizîrê biryara bi Hejmara 5’an di 13’ê Nîsanê de derxist ku 7 nexweşxaneyên li bajarên Qamişlo û Dêrikê bi awayekî demkî bigirin, ji ber ku li gorî pîvanên diyarkirî tev negerîne.

Bi însiyatîfa TEV-DEM’ê îro civînek li Desteya Tenduristiyê li dar ket. Di civînê de hevserokê Desteya Rêveber a Herêma Cizîrê Talet Yûnis, hevserokê Desteya Tenduristiyê ya Bakur û Rojhilatê Sûriyê, hevserokê Yekitiya Bijîşkan, hevserokatiya TEV-DEM’ê, hevserokên Yekitiya Bijîşkên Qamişlo û hevseroka Desteya Tenduristiyê ya Herêma Cizîrê amade bûn.

Di civînê de li ser taloqkirina biryara girtina 7 nexweşxaneyên li Dêrik û Qamişloyê, sozname û biryarên derketine hatin nîqaşkirin.

Di heman çarçoveyê de îro li pêş Nexweşxaneya Ferman a Qamişloyê civînek çapemeiyê hate lidarxistin. Di civînê de endamê rêveber ê nexweşxaneyê  Îyad Abdulkerîm piştî civîna bi Desteya Tenduristiyê re, taloqkirina desteyê ya biryara girtina nexweşxaneyan eşkere kir.

Îyad Abdulkerîm diyar kir ku TEV-DEM, Rêveberiya Xweser û Yekitiya Bijîşkan li biryara girtina nexweşxaneyên li herêmê vegerîn. Abdulkerîm wiha got: "Biryara Desteya Tenduristiyê hat taloqkirin û dê nexweşan pêşwaz bikin."

Îyad Abdulkerîm spasiya TEV-DEM’ê, Rêveberiya Xweser û Yekitiya Bijîşkan kir û diyar kir ku dê nexweşxane heta 4 rojan nexweşan bê pere derman bikin û piştrast kir ku dê li gorî biryarên Rêveberiya Xweser û Şaneya Aloziyê tev bigerin.

(fr)

ANHA