Bi armanca eşkerekirina tenduristiya Ocalan bi hezaran efrînî daketin qadan

Îro bi însiyatîfa Kongreya Star bi hezaran şêniyên herêma Efrînê li kantona Şehbayê daketin qadan û banga sehkirina rewşa Ocalan kir. Meşê ji têketina navçeya Ehdas a kantona Şehbayê dest pê kir.

Xwepêşandêran wêneyên Ocalan rakirin û piştrast kir ku ew ê terka fikrên Ocalan nekin. Xwepêşandêran her wiha pankartên bi zimanê erebî û bi zimanê kurdî hatibûn nivîsandin rakirin.

Xwepêşandêr li kolanên sereke yên navçeya Ehdas geriyan û ber bi gundê Mirata yê kantona Şehbayê ve çûn.Xwepêşandêran sloganên şermezarkirina tecrîda li ser Ocalan berz kirin û banga azadiya rêbertî kirin.

Li gundê Mirata meş veguherî mîtîngê û li ser navê Kongreya Star a Kantona Efrînê Sureya Hebeş axivî. Sureya soza berdewama têkoşîna di oxira azadiya rêbertî de da û wiha pê de çû: "Selametiya Rêber Ocalan ji bo me girîng e, lewma em daketin kolanan û banga eşkerekirina tenduristiya rêbertî dikin, li gel vê yekê heta rêbertî ji girtîgeha Îmraliyê rizgar bibe dê çalakiyên xwe berdewam bikin.

Sureya diyar kir, ku divê gelên Kurdistanê û cîhanê pêk ve ji bo rêbertî dakevin qadan, ji ber rêber Ocalan em ji kirîzan xelas kirine.

Her wiha ser navê Yekîtiya Jinên Azad ên kantona Şehbayê Melik Hisên axivî û wiha anî ziman"Komployê li dijî rêbertî hêj berdewam in, ji beriya 2 salan ve tecrîd li dijî Rêber Ocalan daye ferzkirin, ev jî isbata komployên navdewletî yên li dijî rêbertî û li dijî gelan e.

Melik bêdengiya navdewletî beramberî tecrîda li dijî Ocalan şermezar kir û bang li welatiyan kir, ku asta têkoşîna xwe bilind bikin, dakevin qadan û çalakiyên li dar bixin.

(eh)

ANHA