Koçberên kampa Holê dest bi qeydkirina navên xwe kir

23`yê vê mehê şandeyek ji Rêveberiya Xweser a Bakur û Rojhilatê Sûriyê piştî komxebata êlan ku li navçeya Eyn Îsayê hat lidarxistin, serdana kampa Holê kir. Di civînê de biryar hat dayîn ku koçberên ji Bakur û Rojhilatê Sûriyê ku di kampan de ne, wan li herêmên wan vegerînin. Şande ji hevserokên Meclisa Rêveber a Rêveberiya Xweser a Bakur û Rojhilatê Sûriyê Bêrîvan Xalid, Ebid Hamid Mehbaş, cîgirên serokatiyê Elizabeth Gewriye, Emîna Osê, yek ji berpirsên kampên li Bakur û Rojhilatê Sûriyê Şêxmûs Ehmed pêk dihat.

Di serdanê de hevseroka Meclisa Rêveber a Rêveberiya Xweser a Bakur û Rojhilatê Sûriyê Bêrîvan Xalid got kesên ku wê vegerînin jin û zarokên ji herêmên Bakur û Rojhilatê Sûriyê ne, ku ji ber rewşa şer li herêmê û kiryarên çeteyên DAIŞ`ê koçber bûne.

Li ser xwesteka ku Rêveberiya Xweser a Bakur û Rojhilatê Sûriyê û rêveberiya kampa Holê ya dikeve aliyê rojhilatê bajarê Hesekê, duh rêveberiya kampê ragihand ku koçberên dixwazin li bajar û gundên xwe yên li Reqa û Tebqayê vegerin, bila dest bi qeydkirina navên xwe bikin.

Niha di kampa Holê de nêzî 31 hezar û 436 koçberên ji Sûriyê û malbatên çeteyan jî hene. Hejmara malbatên di kampê de 9 hezar û 220 e.

Rêveberiya kampê ji ajansa me re diyar kir ku di destpêkê de wê dest bi qeydkirina navên koçberên ji Reqa û Tebqayê bikin, di demên pêş de jî dê navên kesên ku dixwazin li malên xwe yên li Bakur û Rojhilatê Sûriyê vegerin, qeyd bikin ku sivîl in û ne ji malbatên çeteyên DAIŞ`ê ne.

Di vê çarçoveyê de hevseroka kampên li kantona Hesekê Macîda Emîn got duh di saetên sibê de qeydkirina navan dest pê kir, gelek kes navên xwe qeyd dikin û di dawiya vê heftiyê de dê wan li malên wan vegerînin.

Macîda destnîşan kir ku ew texmîn dikin ku piştî qeydkirina navan zêdetirî hezar kes li malên xwe vegerin.

(bx)

ANHA