Li Reqayê Meclisa Qehtaniya xebatan pêş dixe

Piştî ku QSD’ê Reqa ji çeteyên DAIŞ’ê rizgar kir, Meclisa Sivîl a Reqayê dest bi xebatên rêxistinkirin û jinûve avakirina bajarê kir. Meclisê di vê çarçoveyê de şênî di nava komîn û meclisan de bi rêxistin kirin da ku karibin bi xwe xwe rêveberin û pêwîstiyên xwe bi cih bînin.

Meclisa Qehtaniya ya gundewarê bakurê rojavayê Reqayê ku 6 km dûrî bajêr e, di 4‘ê Çileya 2019‘an de hate avakirin. Meclisa Qehtaniya 5 mezre û 6 gund di nav xwe de digire, "Qehraniya, Rebîa, Yarûb, Ednaniya, Bîr El-Heşim û Seqûra" û bi derfetên kêm xizmeta gel dike.

Hevserokê Meclisa Qehtaniya Îsa El-Fenûş diyar kir ku piştî rizgarkirina bajarê Reqayê ji çeteyan wan yekser dest bi rêxistinkirina civakê kirin û di vê çarçoveyê de şênî di nava komîn û meclisan de  bi rêxistin kirin.

Îsa El-Fenûş anî ziman ku 22 komîn û meclis li gund û mezreyan hatin avakirin û bi derfetên di dest wan de xizmetê dikin.

Xebatên ku hatine kirin

Meclisê di demên dawî de, ceyran gihand piraniya gund û mezreyên girêdayî Meclisa Qehtaniya. Rojane 12 saet ceyran tê dayîn.

Her wiha meclisê ava zelalkirî ku tê kontrolkirin gihan ji sedî 75 mezre û gundên girêdayî meclisê.

Li aliyekî din jî ji bo alîkardayîna bi cotkaran re mazot li wan tê belavkirin.

Meclisa Qehtaniya rêyên di navbera gund û mezreyan de vekirin, wekî Rêya Hetîn-Qehtaniya, Qehtaniya –Yarûb, Yarûb – Rebîna û hin rêyên din vekirin.

Hevserokê Meclisa Qehtaniya soz da şêniyên gundewarên bakurê rojavayê Reqayê ku ew ê di demên pêş de xebatên xwe berfirehtir bikin.

ANHA