Pêşangeha "Ji bo te Efrîn" vê carê li Hesekê bû

HESEKÊ

Bi slogan "Ji bo te Efrîn" li bajarê Hesekê, pêşangeha wênesazan bi hevkariya Yekitiya Rewşenbîrên kantona Efrînê û Yekitiya Rewşenbîrên Kantona Cizîrê hat vekirin.

Tê zanîn ku pêşengaha ku li bajarê Hesekê hatiye vekirin, piştî pêşangehên li bajarên mîna Şehba, Heleb û bajarokê Rimêlan ê navçeya Girkê Legê hate vekirin.

Şêwekar Ardalan Îbrahîm, Henîf Hemo, Roşan Sîno, Lodmîla Horo û Şervîn Mihemed beşdarî pêşangehê bûn ku li Hola Erd El-Ehlam a taxa Til Hecer a bajarê Hesekê pêk hat. Di pêşangehê de 30 tabloyên êşa şêniyên Efrînê û talankirinên ku Tirkiye û çeteyên wê der heqê wan de pêk anîne, hatine pêşandan.

Têkildarî mijarê Ardalan Îbrahîm ku endamê Yekitiya Rewşenbîrên Kantona Efrînê ye, ji ajansa me re axivî û wiha got: "Me gelek zehmetî ji aliyê dagirkeriya Tirk û çeteyên wê ve kişandin û bi rêya tabloyên xwe, me der barê doza Efrînê, berxwedana şêniyan a li dijî dagirkeriyê û komkujiyên ku şêniyan ser destê dagirkeriyê dîtine de raber kir.”

Ardalan wiha axaftina xwe domand: "Piştî bajarê Hesekê, em ê berê xwe bidin Qamişlo, paşê Kobanê, Minbic û herî dawî jî dewletên erebî û Ewropayê."

Endamê Yekitiya Rewşenbîran diyar kir ku armanca pêşandana van tabloyan, ew e ku cîhan bi tevahî rastiya komkujî û guhartina demografyayê ya ku dagirkeriya Tirk li ser Efrînê de pêk aniye, diyar bike.

Di dawiya axaftina xwe de Ardalan Îbrahîm wiha anî ziman: "Me ji Kampa Şehbayê dest pê kir, ev jî nîşana ku vîna me û hêviya me xurt e ku em ê li Efrînê vegerin û dê ji dagirkeriyê were rizgarkirin."

Tê payîn ku pêşandan 2 rojan li bajarê Hesekê bidome.

ANHA