Li Bendava Firatê dê 200 hezar şitil werin amadekirin

Rêveberiya Parkan a Bendava Firatê bi rêya projeya meştela çandiniyê ku beriya 15 rojan dest pê kir, hewl dide şînkahiya herêmê vejîne û hin cureyên daran ên baş biparêze.

CIVAK Û JIYAN

27 sibat, 2019 07:40

TEBQA

Di projeyê de 200 hezar şitilên cihêreng ji darên daristanî û berhemdar mîna tiriyê hilwanî, sêv, hirmî, tû, hinar, tevî darên xemilandinê û cureyên cuda yên gulan dê werin çandin.

Bi însiyatîfa karkerên parkên bendavê û 12 jinan amadekirina 75 hezar şitilên cihêreng bi dawî bûne. Li gorî berpirsê projeyê Emar El-Mebrûk tê payîn ku proje di mehekê de bi dawî bibe.

Emar El-Mebrûk tekez kir ku di projeyê de hewl didin cureyên baş ji daran hilbijêrin. Di çarçoveya vegerandina şînkahiya herêmê de ev dar dê li tevahiya bajarê Tebqa û gundewarên wê werin çandin.

Hêjayî bibîrxistinê ye ku Rêveberiya Parkên Bendava Firatê bi hevkariya Beşa Hawîrdorê ya Şaredariya Gel a Tebqayê di sala borî de parkên bendavê ji aliyê başûrê bendavê ve restore kirin. Çeteyan dema herêm dagir kiribû, parkên bendavê wêran kiribûn û veguherandibûn nuqteyên leşkerî. Di xebatên sererastkirinê de, mayinên ku DAIŞ`ê lê çandibûn û bermahiyên wan hatin rakirin.

(şx)

ANHA