‘Kesê piştî De Mistura, divê destûreke ku nûnertiya gelên Sûriyeyê dike, saz bike’

TIRKÎ EL-KALIT-MIHEMED EL-EHMED / GIRÊ SPÎ

Hevseroka Meclisa Giştî ya Rêveberiya Xweser a Bakur û Rojhilatê Sûriyeyê Sîham Qeryo di demekê de ku nûnerê navneteweyî yê ji bo Sûriyeyê Staffan De Mistura îstîfaya xwe radest kir û li şûna wî kesekî din dê were erkdarkirin, ji ajansa me re axivî.

Di destpêka gotinên xwe de Sîham destnîşan kir ku pêwîst e hemû pêkhateyên Bakur û Rojhilatê Sûriyeyê tev li amadekirina destûreke nû j bo Sûriyeyê bibin û ev tişt got: “Divê kesê piştî De Mistura were erkdarkirin, destûreke ku nûneriya hemû gelên Sûriyeyê bike, saz bike.”

Sîham wiha domand:"Divê hemû cîhan rola QSD`ê ku ji hemû pêkhateyên Bakur û Rojhilatê Sûriyeyê pêk tê, di rizgarkirina zêdetirî ji sedî 30 ji xaka Sûriyeyê ji dagirkeriya çeteyên DAIŞ`ê nas bike.”

Hevseroka Meclisa Giştî ya Rêveberiya Xweser a Bakur û Rojhilatê Sûriyeyê diyar kir ku dewleta Tirk bi rêya 'kaxizên zextê' hewl dide wan ji tevlêbûna xebatên siyasî yên navneteweyî dûr bihêle û wiha got: "Dewleta Tirk dixwaze rola Rêveberiyên Xweseriya Demokratîk a pêşeng û girîng a di bin banê Meclisa Sûriyeya Demoktaîk (MSD) de ji ber çavan veşêre."

Her wiha Sîham bêdengiya navdewletî li hemberî dagirkirina Efrînê û binpêkirinên wê yên hovane der heqê şêniyan de şermezar kirin.

Sîham Qeryo destnîşan kir ku dagirkirina dewleta Tirk ji Efrînê re, binpêkirina serweriya xaka Sûriyeyê ye û bi van gotinan dawî li nirxandina xwe anî: “Berjewendiyên aborî, leşkerî û siyasî di navbera dewletên herêmî û cîhanî de, bêdengiyê li hemberî binpêkirinên ku tenê gelê Sûriyeyê temenê wê didin, rewa dike.”

(şx)

ANHA