Bê pere xizmetên tenduristiyê ji welatiyan re pêşkêş dike

ŞEVÎN HESEN / HESEKÊ

Ji bo alîkariya şêniyên ku rewşa wan a madî pir ne baş e û ji bo peydakirina cihên tenduristiyê ku bi şev û roj xizmeta şêniyan bike, Desteya Tenduristî ya Rêveberiya Xweseriya Demokratîk navendeke tenduristiyê li taxa El-Kelasê vekir. Armanca navendê li gorî derfetên heyî pêşkêşkirina derman û tedawiyê bê pere ye.

Navend an jî noqteya tenduristiyê ku  di Tîrmeha 2016`an hate vekirin, yekemîn navend e ku li bajar tê hesbandin.

Navend deriyên xwe bi du dewaman ji nexweşan re vedike. Dewama yekemîn ji saet 8:00`an û heta 11:00’an ji bo pêşwazîkirina nexweşiyên dil û hundirîn dest pê dike. Dewama duyemîn ji saet 11:00`an heta 2:00`yan piştî nîvro ji bo pêşwazîkirina nexweşiyên zarokan.

Li navendê 2 bijîşk, 2 ebe, dîwan û nobetdarek dixebitin. Her wiha dermanxaneyek û taqîgehek li navendê heye. Hemû ji saet 8:00`an heta saet 2:00`yan dixebitin.

Têkildarî mijarê endamê rêveber ê navendê Mihemed El-Abdullah ji ajansa me re diyar kir ku armanca vekirina navendê bê pere pêşkêşkirina xizmetê ji welatiyan re ye. El-Abdullah wiha domand: “Ji saet 8:00`an heta 2:00`yan em hemû pêkhateyên herêmê pêşwazî dikin.”

Her wiha El-Abdullah got: “Em gelek nexweşiyên wekî laşmanya derman dikin û li taqîgehê navendê tehlîlan çêdikin û yên ji derve qebûl nakin.” 

Di dawiyê de El-Abdullah diyar kir ku 2 ebeyên pispor çavdêriya beşa nexweşên jinan dikin û 2 hemşîre destwerdanên lezgîn ji nexweşan re pêşkêş dikin.

(şx)

ANHA