Di demeke nêz de dê tovan baş li cotkarên Tirbespiyê bên belavkirin

RÊNAS REMO-KADAR IBRAHÎM / QAMIŞLO

Ji bo bidestxistina hilberîneke baş a çandiniyê ya îsal, Saziya Zêdekirina Tovan gelek cureyên tovan wekî Doma 1, Doma 4, Şam 3, Şam 7, Şam 4 a hişk û Bihûs 9 peyda kirin. Ev cureyên tovan ên herî baş in.

Saziya Zêdekirina Tovan a navçeya Tirbespiyê îsal dê tovan bi du rêbazan belav bike. A yekê bi rêya peymanan li zeviyên çandiniyê yên avî wek deyn dê xebatê bimeşîne. Her wiha bi armanca yekgirtina cureyan û pêşxistina wan dê semad û tovên wekî Doma 1, Şam 3, Şam 7, Bihûs 9 û Doma 4 belav bike. Her wiha sazî dê çavdêriya zeviyan bike û dê hilberînê ji cotkaran wergire.

Şertên Saziya Zêdekirina Tovan

Ji bo belavkirina tovan divê cotkar hindek şert û mercan bi cih bînin. Şert û merc ev in: Divê zevî beyar bin an jî cihê çandina sebze û baqûlî bin. Divê di zeviyan de bîrek hebe. Divê rûbera zeviyan ne zêdetirî 60 dinoman bin.

Rêya din a belavkirinê taybet bo zeviyên bejahî ye. Saziya Zêdekirina Tovan dê tovan bi buhayên erzan belav bike. Her wiha divê cotkar belgeyekê ji komînê bînin û tê de rûbera zeviyê hatiye xuyakirin û fotokopiyeke nasnameya xwe bînin.

Belavkirina tovan 20’ê Îlonê dest pê dike

Endamê rêveber ê Saziya Zêdekirina Tovan Yunis Hecî destnîşan kir ku sazî tov pak kirine û da ku zirar negihîjê depo kirine. Her wiha diyar kir ku sazî tovan dê di navbera 20-25 Îlonê de li cotkaran belav bike.

(şx)

ANHA