Hilberîna çandiniyê ya Dêrazorê ji ber bahoza qûmê ziyan dîtiye

HEMED EL-MISTEFA / DÊRAZOR

Gundê Hemmar El-Elî a gundewarê rojhilatê Dêrazorê li ber çemê Firatê hatiye avakirin û welatiyên wê di çandiniyê û xwedîkirina sewalan de dixebitin.

Di van demên borî de piştî ku hikûmeta AKP'ê rêjeya herikîna ava çemê Firatê li ser Sûriyeyê gelekî kêm kir pirsgirêka bahoza qûmê li gelek erd û zeviyên gundewarê Dêrazorê derket holê.

Sedema duyemîn a paşveçûna çandiniyê rewşa şer e ku ti alî alîkariya karûbarên çandiniyê nakin.

Li gorî welatiyên gund dema ba radibe zeviyên wan ên çandiniyê di bin qûmê de dimînin û ev yek ziyaneke mezin bi hilberîna cotkaran a îsal dike.

Girêdayî mijarê nûçegihanê ajansa me ANHA'yê serdana hin cotkarên gund kir û wan jî pirsgirêkên xwe yên çandiniyê û êşa xwe vegotin.

Cotkarê bi navê Îbrahîm Ewad El-Sultan diyar kir ku ji ber kêmbûna rêjeya herikîna ava çemê Firatê pirsgirêka bahozên qûmê ya îsal zêde bûye û ziyaneke mezin bi çandiniya wan bûye.

El-Sultan got ku ev pirsgirêk çend sal in tê jiyankirin û salane pirsgirêk zêde dibe û ti çareserî jêre nehatiye peyda kirin û wiha got: "Em bang li aliyên têkldar û rêxistinên navnetewî dikin ku vê pirsgirêkê çareser bikin û zextê li hikûmeta AKP'ê bikin da ku para Sûriyeyê ji ava çem berde."

Welatiya bi navê Efra El-Mehmûd got ku çandiniya wê ku sebze çandiye ziyaneke mezin dîtiye û wiha got: "bi hatina havînê re em sebzeyê diçînin da ku em debara xwe jê werbigirin, lê di encama kêmbûna ava avdanê û bahozên qûmê de çandiniya min hişk bû."

Efra her wiha got ku ber toz û qûmê ew nikarin xew bikin û di encamê de piraniya welatiyên gund koçber bûn û mal û milkên xwe li pey xwe hiştin.

Efra bang li aliyên têkldar kir ku vê pirsgirêkê çareser bikin da ku welatî karibin ji zeviyên xwe sûd werbigirin.

ANHA