ˊArmanc ji cezayên dîsplînê bêparhiştina Rêbertî ji mafê hêviyê yeˊ

25`ê Adara 2021`an Rêber Abdullah Ocalan 5 deqe bi rêya telefonê bi birayê xwe re axivîbû û ji wê demê ve ti agahî jê nayê girtin. Dewleta Tirk a dagirker, ji wê dîrokê ve, hevdîtinên malbatê û parêzeran li Rêber Abdullah Ocalan bi hinceta "cezayên dîsplînê" qedexe dike. Cezayê herî dawî 21`ê Gulanê bû ku qedexeya hevdîtinê bi malbat û parêzeran re heta 6 mehên din dirêj kir.

Rewşenbîr Mîlad Yûsif ê ji Tebqayê diyar kir ku desthilata Tirk ji 25`ê Adara 2021`an ve, tecrîdeke giran li Rêber Abdullah Ocalan ferz dike û li hember vê tecrîdê, aliyên navneteweyî, mirovî û hiqûqî yên têkildar bê deng in.

Yûsif wiha domand: "Tirkiye bi birîna van cezayan, qanûn û pîvanên navneteweyî binpê dike. Ev ceza, derqanûnî ne û dûrî pîvanên dan û standina bi girtiyên siyasî re ne. Ji bo ku Rêber Abdullah Ocalan ji `mafê hêviyê` bê par bihêle ew ceza hincet in."

Yûsif diyar kir ku desthilata Tirk bi rêya tecrîdê dixwaze, dozên nakok bê çare bihêle, vîna gelên azadîxwaz û yên ji bo azadiyê tê dikoşin bişikîne û wiha domand: "Lê çi dike bila bike, nikare vîna gelê herêmê têk bibe. Dewleta Tirk nikare vîn û îsrara gelê herêmê ya pêkanîna azadiya fîzîkî ya Rêber Abdullah Ocalan têk be."

Yûsif di dawiyê de got: "Em bang li rêxistinên hiqûqî û mirovî dikin ku rola xwe bilîzin, fişarê li desthilata Tirk bikin ji bo ku rewşa Rêber Abdullah Ocalan aşkera bike, destûrê bide parêzer û malbatê ku bi wî re hevdîtinê bikin û tecrîdê bi dawî bike."

Endamê Navenda Çand û Hunerê ya kantona Tebqayê, rewşenbîr Amir Inad jî tecrîd, "cezayên dîsplînê" û bêdengiya navnteweyî ya li hember van siyasetên dijminane, şermezar kir.

Inad wiha pê de çû: "Tirkiye bi van sûcên di şexsê Rêber Abdullah Ocalan û girtiyên siyasî de dixwaze rastiya siyaseta xwe ya kirêt veşêre."

Amir Inad bang li saziyên navneteweyî yên NY`yê, CPT kir ku berpirsyariyên xwe bînin cih, tecrîdê bi dawî bikin, rewşa Rêber Abdullah Ocalan aşkera bikin û azadiya wî ya fîzîkî misoger bikin.

Inad bal kişand ser rola gelên azad di temamkirina projeya neteweya demokratîk a Rêber Abdullah Ocalan de û got: "Ji bo tunekirina tecrîdê û bidestxistina azadiya fîzîkî ya Rêber Abdullah Ocalan, divê têkoşîn were mezinkirin."

)şx(

ANHA