Şehîdên enternasyonalîst hatin bibîranîn

Bi boneya salvegera şehadeta têkoşera enternasyonalîst a Yewnan Eleftheria Fortoulaki ya ku 24'ê Adara 2006'an ku ji bo şermezarkirina Komploya Navneteweyî ya li dijî Rêber Abdullah Ocalan bedena xwe şewitand, Meclisa Malbatên Şehîdan a bajarê Qamişloyê merasîma bîranîna 54 şehîdên enternasyonalîst ên tevgera azadiyê li dar xist.

Merasîm li hola Pakrewangeha Şehîd Delîl Saroxan bi amadebûna endamên Meclisa Malbatên Şehîdan, nûnerên saziyên sivîl, partiyên siyasî, rewşenbîr û şêniyên bajar pêk hat.

Di merasîmê de piştî deqeya rêzgirtinê, axaftin ji aliyê endamê Meclisa Malbatên Şehîdan a Qamişloyê Mihyedîn Hesen, endamê Desteya Hevserokatiya PYD'ê Aldar Xelîl û rêvebera Kongra Star Jiyan Şîtka ve hatin kirin.

Di axaftinan de şehîdên azadiyê hatin bibîranîn û soza domandina têkoşînê û parastina destkeftiyan hate dayîn. Hate gotin: "Tevgera Azadiyê ya bi serokatiya Rêber Abdullah Ocalan roj bi roj bi pêşentiya jinan pêş dikeve. Divê em têkoşîna avakirina jiyaneke azad bidomînin.”

Piştî axaftinan sînevîzyonek bi helbesta dayika şehîdekî û wêneyên şehîdên enternasyonalîst ên şoreşa Rojava hat nîşandan.

Merasîm bi dirûşmên dilsoziya bi şehîdan re bi dawî bû.

(bb)

ANHA