Rêveberiya Xweser dest bi avakirina nexweşxaneyekê kir

Rêveberiya Xweseriya Demokratîk a Kantona Cizîrê nexweşxaneyeke welidandin û zarokan ava dike. Çav li rê ye ku nexweşxane heta 15 mehên din bikeve xizmetê.

CIVAK Û JIYAN

7 gulan, 2024 15:08

QAMIŞLO

Desteya Tenduristiyê ya Rêveberiya Xweseriya Demokratîk a Kantona Cizîrê di civîneke çapemeniyê de ragihand ku dest bi avakirina nexweşxaneyeke welidandin û zarokan kiriye.

Nexweşxane li taxa Cemaya ya Qamişloyê tê avakirin. Civîn bi amadebûna hevseroka Meclisa Rêveber a Kantona Cizîrê Vîviyan Beho Osê û cîgira hevserokatiya meclisê Ahîn Siwêd li cihê avakirina nexweşxaneyê pêk hat.

Hevserokên Desteya Tenduristiyê ya Kantona Cizîrê Miasir El Ebas û Xalid Dawûd daxuyanî bi erebî û kurdî xwend.

Di daxuyaniyê de hate diyarkirin ku avakirina nexweşxaneya welidandin û zarokan yek ji plansaziya jinên endamên Rêveberiya Xweser a Kantona Cizîrê ye û ev agahî hatin parvekirin: “Nexweşxane ji 3 qatan û pêvekekê pêk tê. Firehiya nexweşxaneyê 2 hezar û 800 metreçargoşe ye. Komîteyên têkildar dest bi xebatên kolandin û avakirina zemîna nexweşxaneyê kiriye. Lêçûna nexweşxaneyê 2 milyon û 45 hezar dolarê amerîkî ye.”

Di daxuyaniyê de hate gotin, projeya avakirina nexweşxaneyê dê 465 rojan dewam bike.

(bb)

ANHA