Pira Herbî heta çend rojan dikeve xizmetê

Rêveberiya Xweseriya Demokratîk a Kantona Dêrazorê 21’ê Kanûna 2024’an sererastkirina Pira Herbî (Leşkerî) ya li ser çemê Firatê dabû destpêkirin.

Pira Herbî ya di navbera bajarokê Hisêniyê û navenda bajarê Dêrazorê de, yek ji 3 piran e ku rojhilat û rojavayê çemê Firatê bi hev ve girê didin. Pira Herbî rêya yekane ya derbasbûna erebeyan di navbera rojhilat û rojavayê Firatê de ye. Di heman demê de wekî rêya bazirganiyê tê bikaranîn, nemaze ku pirên din di dema serweriya çeteyên DAIŞ’ê û rejîma Baasê de hatin hilweşandin.

Sererastkirina pirê dê tevgera çûn û hatinê hêsan bike ku êdî rêyên xirabbûyî û yên dirêj nayên bikaranîn.

Endamê Desteya Serokatiyê ya Meclisa Rêveber a Kantona Dêrazorê Mahir El Emleh der barê sererastkirina pirê de agahî dan ajansa me.

Mahir El Emleh bi bîr xist ku pirê gelek zirar dîtibû û ji xizmetê derketibû. El Emleh anî ziman ku ekîbên sererastkirinê yên Desteya Xizmetguzarî ya Kantona Dêrazorê û Şîrketa El Şemal bi hevkariya Daîreya Xizmetan a Dêrazorê ji bo serersatkirina pirê xebateke mezin dimeşîne.

El Emleh da zanîn ku lêçûna sererastkirina pirê 54 hezar dolar e û mizgînî da şêniyan ku di çend rojên pêş de pir bikeve xizmetê.

(bb)

ANHA