Li Zanîngeha Kobanê têkildarî zimanê Kurdî panel

Bi amadebûna endamên sazî û dezgehên Rêveberiya Xweser, mamoste û xwendekarên zanîngehê panel li Zanîngeha Kobanê hat lidarxistin. Panel bi diruşma "Perwerdehiya bi zimanê dayîkê di sîstema Sûriya nû de" li hola rewşenbîr Îbrahîm Ehmed a li zanîngehê hat organîzekirin.

Di panelê de hevseroka Desteya Perwerdê û Fêrkirinê ya Bakur û Rojhilatê Sûriyeyê, hevserokên Desteya Perwerdê û Fêrkirinê ya kantona Firatê û mamosteyên zimanê Kurdî û endamên SZK’ê amade bûn.

Panel bi deqeyekê rêzgirtinê dest pê kir. Hevserokê Zanîngeha Kobanê Şervan Muslim axivî û got: "Mirov bi nasnameya xwe tê nasîn, nasnameya mirovan jî zimanê mirov e. Divê her kes bi zimanê xwe binivisîne û bixwîne."

Muslim destnîşan kir bi salane ji bo zimanê Kurdî xebat û ked tê dayîn, ji bo wê divê di destûra Sûriya nû de mafê xwendina bi zimanê Kurdî misoger be.

Panel ji 5 mijaran pêk hat. Panel li ser bernameyên Saziya Zimanê Kurdî di pêşvebiriya zimanî de çi ye ji aliyê rêveberiyê komîteya Zimanî ya SZK’ê Nêçîrvan Ebdulezîz,  xebatên Kurdîkirinê û astengiyên wergerandinê ji aliyê wergêr û akademisyen Ehmed Hesen ve, her wiha bi rêya zoomê Dr. Hîwa Selam li ser tecrûbeyên zimanê Kurdî li Başûrê Kurdistanê hat nîqaşkirin.

Di dawiyê de jî der barê dan û standinên di navbera Desteya Pewrerdê û Fêrkirinê ya Herêma Bakur û Rojhilatê Sûriyeyê û desthilata Şamê de mamoste Semîra Hec Elî axivî, her wiha têkildarî rewşa zimanê Kurdî di qada akademîk û pêvajoya nû de ku xwedî roleke çawa ye ji aliyê mamoste Ebdulkerîm Elûş ve hat nîqaşkirin.

(sş/fr)

ANHA