Hewldanên ji bo parastina çandiniyê berdewam in

Şêniyên bajarê Dirbêsiyê li kêleka Hêzên Ewlekariya Hundin, komîteyên parastinê û rewşên awarte, hewl didin zeviyan biparêzin. Ji bo wê nobetê li zeviyan û rêyên sereke digirin.

Rêveberiya Xweseriya Demokratîk a Hantona Cizîrê 6 nuqteyên rewşên awarte li Dirbêsiyê û bajarokên wê çalak kirin. Li wan navendan, amûrên agirkujiyê û tîm hene ku 24 saetan seferber in.

Girêdayî mijarê şêniyê bi navê Feysal Salih ê ji gundê El Xas ê Dirbêsiyê got: "Em zeviyan diparêzin ji bo ku agir pê nekeve."

Salih wiha domand: "Dewleta Tirk a dagirker bi hedefgirtina zeviyan, dixwaze îstiqrara li herêmê têk bibe û şêniyan koçber bike. Lê belê em dibêjin ev ax rûmeta me ye û em dev jê bernadin."

Şêniya bi navê Rênas Yusif ê ji gundê Bab El Selam ê bajarê Dirbêsiyê jî got: "Em nobetê li ber serê zeviyên li gundan û li ser rêyan digirin. Em alîkariya tîmên rewşên awarte dikin û dema şewat rû bide, hewl didin vemirînin."

Endamê komîteyên parastinê Fermez Mamo jî diyar kir ku xweparastin erkeke bingehîn e got: "Dewriyeyên me di nava zeviyên li gundan û ser rêyan berdewam in. Şênî jî cihê xwe di parastina zeviyan de digirin."

(şx)

ANHA