Ciwanan têkildarî azadiya Rêber Abdullah Ocalan konferansek li dar xist

Tevgera Ciwanên Şoreşger a Sûriyeyê û Yekitiya Jinên Ciwan a Kantona Firatê ji bo azadiya fîzîkî ya Rêber Abdullah Ocalan konferansek li Çand û Hunerê ya Baqî Xido ya li bajarê Kobanê li dar xist. Di konferansê de bi sedan xwendekar û malbatên şehîdan û endamên Kongra Star amade bûn.

Endama Desteya Ciwan û Werzîşê ya Kantona Firatê Mercan Bozan nirxandinên Rêber Abdullah Ocalan xwend û got" Karê herî baş ku ciwan dikin erk û berpirsyariya rêxistinî demokratîk ava dikin. Ciwantiyeke ku nirxekî çandî negirtiye û bi dest nexistiye bi xetere. Destpêkê bi nasnameyên xwe û rastiya xwe ya çandî  bijîn. Divê ciwan xwe, siyasetê û destkeftiyan nas bikin."

Piştre sînevîzyonek li ser jiyana Rêber Abdullah Ocalan û komploya navneteweyî ku li dijî wî hat kirin, hat nîşandan.

Endama Desteya Ciwan û Werzîşê ya Kantona Firatê Avaşîn Misto jî axivî û got: "Bi saya Rêber Abdullah Ocalan em gihiştine vê astê, di saziyên xwe de bi zimanê xwe diaxivin û dinîvisînin. Bi rastî zimanê me ji me re weke xewn û xeyal bû ku em pê bixwînin. "

Avaşîn têkildarî tecrîda li ser Rêber Abdullah Ocalan wiha got:  "Rêber Abdullah Ocalan ev bû 25 sal e di nava çar dîwaran de ye. Zêdetirî 6 meh in tu agahî jê nayê wergirtin. Divê hemû ciwan hêz û vîna xwe xurtir bikin da ku em êdî azadiya fîzîkî ya Rêber Abdullah Ocalan misoger bikin."

Beşdaran têkildarî mijarê nêrînên xwe anîn ziman. Diyar kir ku ew li ser fikir û felsefeya Rêber Abdullah Ocalan xwe bi rêxistin kirine û hêz û îradeya xwe ji Rêber Abdullah Ocalan digirin. Beşdaran her wiha got, dê heta azadiya fizîkî ya Rêber Ocalan têkoşînê bikin.

Konferans bi encamnameyekê bi dawî bû. Endama Yekitiya Jinên Ciwan Silava Nesan encamname xwend.

Encamname wiha ye:

1-Heya Rêber Abdullah Ocalan fîzîkî azad bibe em ê têkoşîna xwe bilind bikin.

2- Hemû kar û xebatên ku em dimeşînin navenda wî de azadiya Rêber Abdullah Ocalan e. Divê azadiya Rêbertî pêk were.

 3-Divê bîrdoziya Rêber Abdullah Ocalan li her derê pêk were.

4- Li her derê komploya li ser Rêber Abdullah Ocalan were şermezarkirin û dijî wê têkoşîneke xurt were meşandin.

5-Tecrîd û îşkenceya ku li ser Rêber Abdullah Ocalan tê meşandin tu carî nayê qebûlkirin. Em ê li hemberî tecrîdê têkoşîneke şoreşgerî pêk bînin.

6- Em ê ramanên Rêber Abdullah Ocalan di ber kêliya jiyana xwe de bidin jiyîn.

7-Em wek ciwan bi têkoşîna Elî Çîçekan tê bikoşin heta Rêber Abdullah Ocalan bi fîzîkî azad bibe.

(sş)

ANHA