‘Berxwedana zarokên me li hemberî dagirkeriyê dê bi serkeftinê tacîdar bibe’

Dewleta Tirk a dagirker ji 16`ê Nîsanê ve bi piştgiriya Partiya Demokrat a Kurdistanê (PDK) êrişî Herêmên Parastinê yên Medyayê dike. 

Şêniyên herêmê û malbatên gerîla li navçeya Çilaxa ev êriş û hevkariya PDK`ê şermezar kirin.

Bavê gerîla Şêrgul Rojava Nimet Seyfudîn berxwedana dîrokî ya Hêzên Parastina Gel (HPG) silav kir ku li çiyayên Kurdistanê ji bo parastina gelan û hebûna wan nîşan didin.

Her wiha Seyfudîn kiryarên PDK`ê û piştgiriya wê ya ji dewleta Tirk a dagirker re şermezar kir û got: "Bi saya berxwedana gerîla Hewlêr neket bin destê DAIŞ`ê. Divê PDK vê rastiyê ji bîr neke."

Seyfudîn destnîşan kir ku malbatên gerîla dê li hember têkbirina destkeftiyên şehîdan bê deng nemînin û divê her kes baş fêm bike ku tesfiyekirina gerîla tê wateya tesfiyekirina gelan.

Dayika gerîla Şêrgul Rojava Celîle Hadî jî destnîşan kir ku zarokên wan li çiyayên Kurdistanê mirovahiyê û axê diparêzin û ew ê tu carî êrişên li ser wan qebûl nekin û diyar kir ku amade ne di oxira azadiyê de fedakariyên din bikin.

Birayê gerîla Luqman Aras Ebdulkerîm Şenî jî got: "Divê PDK`ê ji van rêbaz û kiryaran dûr keve ku tenê xizmetê ji dewleta Tirk re dike. Dewleta Tirk bi hemû rêbazan hewl dide berxwedana kurdan li her derê têk bibe."

Şenî wiha domand: "Gerîla, rûmet û serfiraziya me ne. Hebûna me li ser axa me bi hebûna gerîla ve girêdayî ye. Ji ber ku tenê gerîla nirx û dîroka gelê Kurd û gelên din diparêze. Dijminê kurdistanê jî, vê rastiyê nas dikin, ji ber wê şerê wan dikin û hewl didin ku wan tune bikin ji bo ku rastiya gelan û gelê Kurd tune bikin."

Şenî soz da ku soz da ku têkoşîn û berxwedana li hember dagirkerî, xiyanetê û parastina axê û dîrokê berdewam bikin.

Birayê şervana Yekîneyên Jinên Azad-Star (YJA-Star) Nûdem Rojava, Yunis Hacî got: "Em bawerin ku berxwedana gerîla li hemberî dagirkerî û hevakarên wê, dê bi serkeftinê tacîdar be."

Hacî destnîşan kir ku divê aliyên piştgiriya dewleta Tirk a dagirker di êrişa wê li dijî gerîla de dikin, fêm bikin ku gerîla ne bi tenê ye gel li pişta wan e û dê li hember dijminan li ber xwe bidin ku di kesayeta gerîla de hewl didin gelan qir bikin.

(şx)

ANHA