Şêniyên Dêrazorê ji bo QSD′ê meşiyan

Şêniyên gundewarê bakurê Dêrazorê di meşekê piştgiriya xwe ji Hêzên Sûriyeya Demokratîk (QSD) re nîşan da.

Endamên saziyan û partiyên siyasî û rûspiyên eşîran jî di nav de şêniyên gundewarê bakurê Dêrazorê li pêşiya avahiya meclisa gundewarê bakur ê Dêrazorê kom bûn û ber bi çerxerêya Sehîdan a li navenda bajarokê Siwer ve bi rê ketin. Di meşê de alên QSD û wêneyên Rêber Abdullah Ocalan hatin hildan.

Li wir, bi navê rûspiyên eşîrên bakurê Dêrazorê Ezawî El Herbî daxuyaniyek xwend.

Di daxuyaniyê de hate gotin: "Di dema dawîn de li dijî Bakur û Rojhilatê Sûriyeyê fîtne û komployeke hat meşandin. Ev komplo bi destê hin aliyên dijber hat amadekirin û armanca wan ew bû fîtne û tevliheviyê li herêmê derxin.′′

Di dewama daxuyaniyê de hate diyarkirin ku bi saya hişyarbûna hemû aliyên leşkerî û sivîl  û bi saya berxwedana QSD'ê ev komplo bi hevgirtinekê hat têkbirin. Her wiha hate gotin: ′′Hinek aliyên hundirîn û derve bi komployê xwestin ewlehî û istiqrara herêmê têk bibin. Lê gelê me bi yek destî li hemberî vê komployê sekin û ewlehî li herêmên Bakur û Rojhilatê Sûriyeyê mîsoger kirin. Di dema vê komployê de xwestin milkên giştî û taybetî talan bikin, bidizin û wêran bikin, stasyonên avê teqandin, nexweşxane û saziyên giştî û yên taybet wêran bikin. Armanca wan ew bû ku projeya Rêveberiya Xweser têk bibin, ji ber ku ev proje hêviyên tevahî pêkhateyan di jiyana hevbeş, azadî, edalet û wekheviyê pêk bîne.

Em ji gelê xwe re teqez dikin ku em ê milkên giştî û taybet ji nû ve ava bikin û piştgiriyê bidin QSD′ê.

Em tu destwerdana ji derve û hundir qebûl nakin. Wek ku fermandarê giştî yê QSD'ê Mazlûm Ebdî jî dibêje QSD'ê amade ji bo parastina gel berdêlên herî buha bide û hewldanên fîtneyê têk bibe."

 (mh)

ANHA