`Ji bo serxistina xwepêşandanên li Siwêdayê divê projeyek bê danîn`
Aktîvîsta femînîst Sîlvart Selûm bal kişand ser beşdariya jinan di xwepêşandanên li Siwêdayê de got, ′′Divê beşdarbûneke xurt di qada bîrdozî de jî hebe û ji bo serxistina xwepêşandanan divê projeyek bê danîn.′′
![`Ji bo serxistina xwepêşandanên li Siwêdayê divê projeyek bê danîn`](https://hawarnews.com/kr/uploads/images/202309/063334_055955_25-1.jpg)
Ji destpêka xwepêşandanên li Siwêdayê de beşdariya jinan û bangên wan ên ji bo azadî, jiyaneke bi rûmet û pêkanîna çareseriyeke siyasî ji bo krîza Sûriyeyê balê dikişîne.
XWEPÊŞANDÊN KU LI SER PROJEYEKÊ HATINE AVAKIRIN BI BIN NAKEVIN
Ji deverên din ên Sûriyeyê jin piştgiriya xwe ji daxwazên xwepêşandêrên li Siwêdayê re nîşan da. Der barê vê mijarê de aktîvîsta femînîst û endazyar a ji Helebê Sîlvart Selûm ji ajansa me re axivî. Sîlvart destnîşan kir ku xwepêşandanên li Siwêdayê encama zexta li ser gel e.
Sîlvart got: "Ez piştgiriyê didim xwepêşandanên li Siwêdayê ku beşdarbûna jinan tê de balkêş e. Ev xwepêşandan di encamê zextê de derketin. Lê belê divê di serî de projeyek û planek li ser erdê hebe da ku ev xwepêşandan bi ser kevin û daxwazên xwepêşandêran bên bicihanîn."
Der barê rêbazên parastina van xwepêşandanan ji têkçûnê de Sîlvart Selûm got: "Dema ku ez banga guhertinê dikim divê pêşî projeyek min a zelal hebe, nabe ez bi gotinan tenê bang bikim, lê divê ez ji şaştiyên di xwepêşandanên berê yên têkçûyî de ders bigirim û berê xwe bidim çareseriyên siyasî û aştiyane."
DIVÊ DESTWERDANA DERVE BÊ REDKIRIN
Sîlvart ev li gotinên xwe zêde kir: "Bangkirin erka her kesî ye. Lê ji ber destwerdana ajandeyên derve li xwepêşandanên berê ku destpêkê aştiyane bûn, xwepêşandan veguherîn tundiyê. Ji ber wê jî divê xwepêşandan baş werin plankirin û demek ji bo bicihanîna daxwazên xwepêşandêran bê diyarkirin."
Aktîvîst Sîlvart destnîşan kir ku divê jinên sûriyeyî bi zanabûn û hişmendî û jîrî tev li xwepêşandanan bibin û cihê xwe di plankirinê de bigirin.
'EM Ê BI ZANABÛNA XWE FIKRÊN XWE PÊK BÎNIN'
Sîlvart Selûm di dawiya axaftina xwe de got: "Divê beşdariya jinan di xwepêşandanan de di çarçoveya banga guhertina siyasî û hildana pankartan de sînordar nemîne, lê divê jin bibin xwedî fikr û ji bo pêkanîn fikrên xwe tev bigerin. Em jin divê di radeya yekemîn de hevgirtî bin û bibin yek.”
(mh/şx)
ANHA