Li Til Hemîsê meşek ji bo piştgiriya QSD′ê

Li Til Temîsê ya Qamişloyê ji bo piştgiriya Hêzên Sûriya Demokratîk (QSD) meşek hat lidarxistin. Di meşê de bi sedan şêniyên navçe, nûnerên saziyên sivîl, partiyên siyasî û rûspiyê eşîran beşdar bûn.

Meş ji pêş avahiya Meclisa Navçeyê ya Til Temîsê dest pê kir û li tevahî kolanên sereke geriyan.

Li çerxeriya Sewami meş vegerî mîtîngê. Li wir rûspiyê eşîra El Şemer Mihemed El Şemerî axivî û piştgiriya eşîrên Ereban ên li herêmê ji Operasyona ′Xurtkirina Ewlehiyê′ re nîşan da.

El Şemerî diyar kir ku li pey bûyerên Dêrazorê planeke komplogerî heye û wiha got: "Tiştê li Dêrazorê çêbûye, berê hatibû plankirin. Armanca wê hevgirtinên eşîrên Ereban û QSD′ê û îstîqrara herêmê têk bibin, da ku çeteyên dewleta Tirk bikarin bi hêsanî herêmên me dagir bikin."

El Şemerî wiha domand: "Bi saya hevgirtina hêzên me û şêniyên Dêrzorê ev plan hatin têkbirin."

Endamê Meclisa Malbatên Şehîdan a Til Hemîsê Ebdullah El Salim rola QSD′ê ya parastina destkeftiyên Şoreşa Bakur û Rojhilatê Sûriyeyê silav kir û wiha got: "Serkeftinên îro yên li dijî çeteyên DAIŞ′û dewleta Tirk bi saya fedakariyên hêzên me û hevgirtina şêniyan e."

Her wiha şervanê QSD′ê Mahir Ehmed jî wiha got: "Tiştên îro li ser çapemeniyê derdikevin fitineyek e ji hêla dewleta Tirk a dagirker û rejîmên dîktator ên şerê gelên hewl didin azadiyê pêk bînin. Em ê heta serkeftinê têkoşînê bilind bikin."

Li aliyekî din jî endama Kongra Star a Til Hemîsê Hedîl El Ebdullah piştgiriya xwe ji QSD′ê re nîşan da û soz da ku ew ê li ser şopa şehîdan bin û wiha got: "Em ê li hember planên dijberî azadiya jinê, civak û gelan bibin mertal."

Meş bi diruşmên silavkirina QSD′ê bi dawî bû.

(fr)

ANHA