Meclisa Rêveber civîna xwe bi encamnameyekê bi dawî kir

Meclisa Rêveber a Rêveberiya Xweser a Bakur û Rojhilatê Sûriyeyê civîna xwe ya mehane bi beşdariya Desteya Seroketiyê ya meclisê, nûnerên meclisê û hemû deste û nivîsgeh û hevseroketiyên meclisên xwecih û rêveberiyên herêman bi dawî kir.

Di serî de geşedanên siyasî û ewlekarî bi taybetî der barê operasyona "Xurtkirina ewlehiyê" de û fîtneya ku dewletên herêmî hewl dane wê di herêmê de peyda bikin û aramiya herêmê têk bibin, hatin nîqaşkirin.

Piştre rewşa giştî ya rêveberî, desteyan û xebatên wan û pirsgirêkên ku di karê wan de derdikevin hatin nîqaşkirin, her wiha pirsgirêkên nan, sotemenî, enerjî, avê û sedemên wan û rêbazên çareserkirina wan hatin nîqaşkirin.

Di civînê de danîna hevsengiyeke giştî ya Rêveberiya Xweser û pirsgirêkên ku bandoreke nerênî li projeyên deste û rêveberiyan kirine hatin nîqaşkirin.

Hevserokê Meclisa Rêveber Hisên Osman di civînê destnîşan kir ku hevsengiyek ji bo deste û rêveberî û nivîsgehan dê bê danîn û ew ê di dema pêş de amade be ku girîngiyê bide projeyên ji bo berjewendiyên gel û rêveberiyê.

Di dawiya civînê de encamname ji aliyê hevseroka Meclisa Rêveber a Rêveberiya Xweser a Bakur û Rojhilatê Sûriyeyê Bêrîvan Xalid ve hat xwendin, ku tê 24 xal hene, ew jî ev in:

1- Domandina xebatan ji bo bidestxistina îtîrafa siyasî bi Rêveberiya Xweser di çarçoveya çareseriya siyasî ya kirîza Sûriyeyê de.

2- Berfirehkirina têkiliyên derve bi dewletên herêmî û navneteweyî re bi taybetî dewletên Ereban bi rêya vekirina nûnertiyên nû yên Rêveberiya Xweser.

3- Parastina aramî û ewlehiyê li Bakur û Rojhilatê Sûriyeyê.

4- Li ser bingeha yekitiya axa Sûrieyeyê parastina herêmên Rêveberiya Xwese li hember tevahî êrişan.

5- Parastina destkeftiyên Rêveberiya Xweser.

6- Destekdayîna hêzên ewlekariyê ji bo girtina şaneyên DAIŞ'ê û şaneyên girêdayî ajandeyên din û bidawîkirina diyardeyên li dijî adet, çanda civakê û piştgiriya xebatên têkoşîna li dijî hişbirê.

7- Destekdayîna daîreyên plankirinê û pêkanîna serjimariyeke giştî.

8- Girîngîdayîna projeyên xizmetguzarî yên girêdayî binesaziyê wek qîrkirina rêyan, çaksazkirina piran û danîna torên kanalîzasyonê.

9- Bikaranîna baş a çavkaniyên avî.

10- Destekdayîna saziyên tenduristiyê bi rêya çaksazkirina nexweşxane û navendên tenduristiyê û peydakirina pêdiviyên wan û avakirina nexweşxaneyên nû.

11- Destekdayîna saziyên perwerde û fêrkirinê û çaksazkirina dibistanan û avakirina dibistanên nû, her wiha domandina xebatên yekkirina minhaca xwendinê û peydakirina pirtûkên dibistanan.

12- Destekdayîn û pêşxistina saziyên çavdêriyê bi taybetî ji bo çavdêriya firneyan û başkirina cureyê nan.

13- Handana saziyên berhemdayînê yên ku xwe dispêrin berhemên xwecih û peydakirina derfetên kar.

14- Destekdayîn û pêşxistina çandiniyê û peydakirina hemû pêdiviyên wê û parastin û destekdayîna çavkaniyên sewalvaniyê.

15- Lidarxistina projeyên aborî û xizmetguzarî.

16- Destekdayîna saziyên enerjiyê û peydakirina projeyên alternatîf.

17- Girîngîdayîna kampan û başkirina rewşa koçberan.

18- Pêşxistin û destekdayîna saziyên ragihandinê.

19- Destekdayîna çalakiyên ciwanan, yên çandî û parastina şûnwar û deverên dîrokî.

20- Domandina berfirehkirina planên rêxistinî li gor pêdiviyê.

21- Parastina jîngehê û çareserkirina pirsgirêkên qirêjbûna jîngehî.

22- Destekdayîna hemû çalakiyên jinan û peydakirina hemû rêbazan ji bo derbaskirina zehemtiyên li pêşiya jinan.

23- Destekdayîna malbatên şehîdan û girîngîdayîna zarokên şehîdan bi rêya lidarxistina projeyên ku pêdiviyên wan peyda bikin.

24- Domandina xebatên perwerdekirin û amadekirina karmendên Rêveberiya Xweser.

(mh/şx)

ANHA