Ava golên Firatê ji sedî 85 kêm bûye

Endamê rêveber ê Bendava Rojava (Tişrîn) Hemûd El Hemadîn ji malpera fermî ya Rêveberiya Xweser re axivî.

Hemûd El Hemadîn got: "Siyaseta dewleta Tirk a qutkirina avê û kêmbûna wê di bendavên herêmê de bi xwe re encamên neyênî anîn û bandor li herêmê bi giştî kir. Bi wê re peydakirina ava vexwarinê zehmet kir, xebatên bendavan bi saetên dirêj bi awayekî rojane hatin sekinandin, çem veguherîn çiravan, nexweşiyên vegir û pandemî belav bûn. Ji wê zêdetir zirar gihîşt mewsimên çandiyê, rûberên çandiniyê kêm bûn. Li aliyekî din jî bandoreke yekser li ewlehiya xurekê kir, hilberandina çandinî û aboriyê li herêmê paş ket û ji ber koçberiya ciwanan û kêmbûna kedkar û karkeran a di encama van kiryaran de, guhertina demografiyê li herêmê pêk tê.”

El Hemadîn bi bîr xist ku ev 30 meh in ji ber girtina avê ji aliyê dewleta Tirk a dagirker ve ku di saniyê de tenê 200 metrekab av dide, li herêmê rewşeke karesatê heye û wiha dom kir: “Para herêmê ya normal di her saniyê de 500 metrekab av e. Ji ber girtina avê, ava golên bendavan kêm bû, depoya stratejîk a golên Firatê jî ji sedî 85`ê ava li bendava Tişrînê ji dest da. Wê yekê bandoreke neyînî li avahiyên bendavan, ava vexwarinê û hilberandina kehrebeyê jî kir. Ji ber rawestandina bendavê û nexebitandina hemû torbînan, niha rojane tenê 2 torbîn hteta 7 saetan dixebitin û hêza hilberandina kehrebeyê ji 107 megawat daketiye 75 megawat. Her wiha ji sedî 35`ê hilberandina kehrebeyê ji dest daye.”

El Hemadîn destnîşan kir ku bêdengiya NY, rêxistinên hiqûqî û dewletên herêmê hişt ku rewşa mirovî ya li herêmê aloztir bibe, bandoreke yekser li ewlehiya xurekê kir, gef li jiyana nêzî 7 milyon mirovên li herêmê tê xwarin û wiha dom kir: “Ji ber ku herêm bi giştî xwe dipsêre ava çemê Firatê û bendavên li herêmê. Ji lew re divê NY′yê û rêxistinên hiqûqî destwerdanê bikin û van kiryarên dijminane yên dewleta Tirk bi dawî bikin û para herêmê ya avê (500 metrekab) bê dayîn.”

(fr/c)