Ciwanên Helebê li dijî tecrîdê meşiyan

Yektiya Jinên Ciwan a  Helebê bi dirûşma   "Tu kes nikare roja me tarî bike", meşek li dar xist.

Bi dehan ciwan tev li meşên bûn, posterên Rêber Abdullah Ocalan hildan û pankartên bi nivîsên   "Tu kes nikare roja me tarî bike" û "Jin, Jiyan, Azadî" vekirin.

Ciwanan ji pêşiya hola civînan a li beşê rojava ya taxa Şêxmeqsûdê heta qaa Şehîd Destîna ya li beşê rojhilat ê taxê meşiyan û bi navber dirûşmên "Bijî serok Apo" û "Bê serok jiyan nabe" berz kirin.

Li qada Şehîd Destîna deqeyeke rêz hat girtin. Piştre endama Yekitiya Jinên Ciwan Rîm Milhim axivî. Rîm bal kişand ser ceza û tecrîda li ser Rêber Abdullah Ocalan û got: "Tevî binpêkirinan jî Rêbertî teslîm nebû, lê têkoşîna wî ya ji bo gelan xurtir bû."

Rîm diyar kir ku ew ê çalakiyan berdewam bikin heta azadiya fîzîkî ya Rêber Abdullah Ocalan pêk were.

Endama Koordînasyona Yekitiya Jinên Ciwan a Bakur û Rojhilatê Sûriyeyê Heyfa Bekir anî ziman ku ciwan dê serhildanê bidomînin û got: "Çawa me bi keç û xortan dest bi şoreşê kir, wê azadiya fîzîkî ya Rêbertî bi destê me pêk were. Em ê li ber xwe bidin heta vê yekê pêk bînin."

Heyfa Bekir diyar kir ku hêza ji îradeya Rêbertî girtine têrê dike ku azadiya wî pêk bîne û wiha dawî li axaftina xwe anî: "Bila dewleta Tirk a dagirker bizanibe ku çiqas tecrîda li ser Rêbertî giran bike jî îradeya ciwanan lawaz nabe, lê belê îsrara me ya ji bo pêşketinê zêdetir dibe."

(bb)

ANHA