Kampanyaya hashtagê ya Rêveberiya Xweser didome

Rêveberiya Xweser a Bakur û Rojhilatê Sûriyeyê ji bo naskirina Rêveberiya Xweser kampanyaya hashtagê dabû destpêkirin. Kampanyayê saet di 8′ê êvara duh de dest pê kir.

Hemwextî salvegera 11′an a destpêkirina Şoreşa 19′ê Tîrmehê bi hashtaga ‏#‏Status4NorthAndEastSyria‏ Rêveberiya Xweser hemle da destpêkirin.

Di hemleyê de nûner û hevserokên saziyên Rêveberiya Xweser ên sivîl û leşkerî, fermandarê Hêzên Sûriya Demokratîk (QSD) Mezlûm Ebdî, berdevkê YPG′ê Nûrî Mehmûd, hevseroka Meclisa Rêveber a Rêveberiya Xweser a Bakur û Rojhilatê Sûriyeyê Bêrîvan Xalid, hevseroka PYD′ê Asya Ebdulah, hevserokê TEV-DEM′ê Xerîb Hiso, rewşenbîr, hunermend û çalakvanên medyaya dîjîtal beşdar bûn.

Kampanyaya hashtagê dewam dike û çalakvan diyar dikin ku divê fedakariyên keç û xortên Bakur û Rojhilatê Sûriyeyê yên çeteyên DAIŞ′ê têk birine werin naskirin.

Arîn Denîz bi twittekê wiha got: "11 sal e em di nava şoreşa Rojava de ne, bi destekî şerê dijmin dikin û bi destê din sazî û meclisên xwe ava dikin."

Xerîb Hiso jî bi twittekê got: "Naskirina Rêveberiya Xweseriya Demokratîk a Bakur û Rojhilatê Sûriyeyê tê wateya dawiya krîzê li tevahî Sûriyeyê û herêmê.”

Hevserokê Partiya Kesk a Demokratîk Luqman Ehmê jî di twîtta xwe de wiha got: "Ji bo parastina 5 milyon sivîlên li herêmên Rêveberiya Xweser a Bakur û Rojhilatê Sûriyeyê dijîn, divê ew rêveberî were naskirin."

Li gorî bernameya Nivîsgeha Ragihandinê ya Rêveberiya Xweser a Bakur û Rojhilatê Sûriyeyê ku çavdêriyê li ser hemleya hashtagê dike, çaverê ye hemle îşev bi dawî bibe.

(fr)