Ciwanên Helebê ji bo Rêber Abdullah Ocalan serî hilda

Bi sedan ciwnên li Helebê li hember tecrîda li ser Rêber Abdullah Ocalan û nameyên gefxwarinê yên desthilata Tirkiyeyê û Rêveberiya Girtîgeha Îmraliyê dane Rêber Ocalan meşeke meşaleyî li dar xist.

Ciwan li hola 8`ê Adarê ya li taxa Şêxmeqsûd kom bûn û wêneyên Rêber Abdullah Ocalan bilind kirin.

Ciwanên ku di gelek kolanên taxê re meşiyan bê navber dirûşmeyên silavkirina berxwedana Rêber Abdullah Ocalan li Îmraliyê berz kirin.

Meşvanan piştre berê xwe da cihê ku çalakiya konvedanê ji aliyê Kongra Star û Partiya Yekîtiya Demokratîk (PYD) lê li dar xistiye.

Li wê derê, piştî rêzgirtinê, endama Koordînasyona Yekîtiya Jinên Ciwan a Bakur û Rojhilatê Sûriyeyê Hêva Bekir axivî. Hêva destnîşan kir ku wekî tevgereke ciwanan armanca wan a yekemîn pêkanîna azadiya fîzîkî ya Rêber Abdullah Ocalan e.

Hêva bang li ciwanan kir ku li gorî vê ferasetê û ji bo têkbirina êrişên dagirkeran tevlî nava refên Tevgera Azadiyê bibin.

Hêva diyar kir ku nameyên gefxwarinê yên radestî Rêber Abdullah Ocalan hatine kirin, nayên qebûlkirin û got ku ciwan ji bo Rêbertî amade ne xwe feda bikin.

Hêva destnîşan kir ku felsefeya Rêber Abdullah Ocalan dê wan bigihîne azadiyê û soza şopandina rêya şehîdên azadiyê dubare kir.

(c)

ANHA