Cenazeyê şehîd Tekoşer Efrîn bi merasîmekê hat veşartin

Şervanê Hêzên Rizgariya Efrînê (HRE) Tekoşer Efrîn (Gîvara Nesen) di 5`ê Tîrmehê de dema li ser erka xwe bû şehîd bû.

Şêniyên Şehba û koçberên Efrînê cenazeyê şehîd Tekoşer Efrîn ji Nexweşxaneya Avrînê ya navçeya Fafînê wergirt û bi karwanekî ber bi Goristana Şehîdên Berxwedana Serdemê ya navçeya Ehrizê ve oxir kir.

Li goristanê merasîmek hat lidarxistin. Rêveberê Meclisa Malbatên Şehîdan a Kantona Efrîn û Şehbayê Mihemed Welo axivî, sersaxî ji malbata şehîd Tekoşer û tevahî koçberên Efrînê û xelklê Şehbayê re xwest.

Welo anî ziman ku şehîd Tekoşer îsbat kir ku bêyî berxwedan û fedakariyan welat azad nabin û got, berxwedanaa şêniyên Efrînê yên di kampên koçberiyê û malên nîvkavilkirî de li ser bingehê rizgarkirina Efrînê û vegerê ye.

Welo bal kişand ser êrişên domdar ên dewleta Tirk  a dagirker ên li ser Bakur û Rojhilatê Sûriyeyê û wiha domand: "Dewleta Tirk a dagirker, çeteyên wê û aliyên ku destekê didin wan bi êrişên xwe yên rojane hewl didin me qir bikin û me ji xeta berxwedanê dûr bixin. Lê armancên wan dê negihêjin serî, ji ber ku em bi berxwedanê ve girêdayî ne."

Endama Meclisa Kantona Efrîn û Şehbayê Yildiz Mihemed jî îşaret bi fedakariyên şehîdan û rola wan a rêvebirina civakê, mîsogerkirina azadî û aramiyê û têkbirina planên dagirkeriyê.

Yildiz Mihemed, li dijî dagirkeriyê banga xurtkirina têkoşînê ta rizgarkirina Efrînê kir.

Piştî axaftinan, endama Komîteya Perwerdeya Civaka Demokratîk Fikret Mamo wesîqeya şehadetê ya şehîd Tekoşer Efrîn xwend û radestî malbatê kir.

Di dawiyê de cenazeyê şehîd bi dirûşmên "Şehîd namirin" hat veşartin.

(bb)

ANHA