Li sûkên Bakur û Rojhilatê Sûriyeyê amadekariyên cejnê

Tevgera li sûkên Bakur û Rojhilatê Sûriyeyê bi kirîna pêdiviyên cejnê geş bûye. Şênî jî hêviya rizgarkirina deverên dagirkirî û pêkanîna aramiyê li Sûriyeyê dikin.

CIVAK Û JIYAN

27 hezîran, 2023 07:39

NAVENDA NÛÇEYAN

Sibê roja yekemîn a Cejna Qurbanê ye. Hemwextî kêmbûna nirxê lîreyê Sûriyeyê, li Bakur û Rojhilatê Sûriyeyê tevgera sûk û bazaran nexasim sûkên şekir û şêraniyê û yên cil û bergan geş bûye.

Li hember wê jî welatî hêvî dikin ku piştî rizgarkirina herêmên dagirkirî lê vegerin û cejna xwe li wir pîroz bikin.

Hêzên Ewlekariya Hundirîn ji bo parastina ewlehiya şêniyan, dewriyeyên xwe yên nava bajaran zêde kirin û rêbendên xwe li deriyên sûkan danîn û hin biryarên der barê vê mijarê de derxistin.

Ajansa me nêrînên hin şêniyên li sûka navendî ya Qamişlo girtin. Welatiyê bi navê Ebdulqadir Ferhan (41) got: "Tevî êrişên dewleta Tirk a dagirker ên li dijî herêmê, lê dîsa jî şênî amadekariya cejnê dikin û tevgera sûkê nîşana vê yekê ye."

Her wiha Izedîn Mihemed (27) destnîşan kir ku tevî bihabûna kel û pelan di cejnan de, lê dîsa jî tevgera sûkan geş e ku her kes li gorî derfet û rewşa xwe amadekariya xwe dike. Mihemed got: “Dema ku dewleta Tirk a dagirker ji xaka me derkeve wê demê em dê aramtir bibin û jiyana me jî dê tev bibe cejn."

Li taxên Şêxmeqsûd û Eşrefiyê yên Helebê û kantona Şehbayê rewş cuda ye, nexasim dorpêça hikumeta Şamê li ser van herêman û bihabûna zêde ya kel û pelan heye.

Welatiyê bi navê Ebdulwedûd Osko yê ji taxa Şêxmeqsûd destnîşan kir ku wî pêdiviyên cejnê ji basteyên li sûkê kirîn, ji ber ku ji yên li dikanan erzantir in. Osko diyar kir ku cejna sala borî li gorî ya îsal baştir bû û got: "Tiştê ku me berê bi 25 hezar lîreyan dikirî em niha bi 35 hezar lîreyan dikirin."

Welatiyê bi navê Beşar Elalo ku ew jî firoşkarekî li ser basteyekê ye, got: "Ji ber bihabûna dolar û keysbaziya hin bazirganên mezin kel û pel jî biha dibin.”

Elalo destnîşan kir ku herî zêde karmendan zirar dîtiye ku mûçeyên wan ên heftane ji 50 hezar lîreyan dest pê dikin û got: "Gelo ev pere dê têra çi bikin? Xwarin, cil an çi?"

Elalo di dawiya axaftina xwe de hêvî kir ku rewşa aborî ya gel baş bibe û hezkirin di nav hemû pêkhateyan de belav bibe.

(mh/şx)

ANHA