​​​​​​​ʹKomkujiya li Cindirêsê xelekek ji sûcên li dijî niştecihên Efrînê yeʹ

Têkildarî komkujiya ku çeteyên dewleta Tirk a dagirker di şeva Newrozê de li navçeya Cindirêsê ya Efrîna dagirkirî pêk anîbûn siyasetmendarên Bakur û Rojhilatê Sûriyeyê ji ANHAʹyê re axivîn.

Hevserokê Partiya Kesk a Demokratîk Luqman Ehmê sûcên dewleta Tirk a dagirker şermezar kir û got: "Ji bo vê komkujiyê, bikaranîna têgeha komkujî bi tena serê xwe ne rast e, ji ber ku ev komkujî xelekek ji sûcên din e ku artêşa Tirk a dagirker û çeteyên wê li Efrîna dagirkirî dikin."

Luqman Ehmê anî ziman ku heta dagirkerî neyê bidawîkirin wê sûcên qetilkirin, qirkirina çandî û guhertina demgorafî berdewam bikin.

Ehmê bang li sazî, rêxistinên navneteweyî û Konseya Ewlekariyê ya Neteweyên Yekbûyî kir ku erkên xwe bi cih bînin, dagirkeriya deweleta Tirk a li Sûriyeyê bi dawî bikin û koçberan vegerînin warên wan.

Endamê Partiya Muhafizkarên Demokrat Ednan Îzo jî got, hêzên navneteweyî berpirsên berdewama sûcên hovane ne ku dewleta Tirk a  dagirker li dijî şêniyên Bakur û Rojhilatê Sûriyeyê dike.

Nûnera Partiya Nûjen û Demokratîk a Sûriyeyê Heyfa Mehmûd anî ziman ku armanca dewleta Tirk a dagirker û çeteyên wê ji komkujiya li Cindirêsê ew bû ku meşaleya azadiyê vemirînin û berxwedanê têk bibin.

Heyfa Mehmûd got, ji bo mîsogerkirina serkeftinê û bidawîkirina dagirkeriya Tirk a li Sûriyeyê divê têkoşîn were geşkirin.

(bb)

ANHA